Мың түйеден құралған керуен Гиннестің рекордтар кітабына енді

Алматы облысында бір өркешті мың түйеден құралған керуен ресми түрде Гиннестің рекордтар кітабына енді. Бір шақырым қашықтықты жүріп өткен керуен 20 қыркүйекте Іле ауданының Күрті ауылында ұйымдастырылған болатын.

Гиннестің рекордтар кітабының өкілі Ричард-Уильям Стэннинг қазақстандық жобаның ерекшелігіне ерекше тоқталд.

— Бұл — айрықша жағдай. Өзге елдерде мұндай керуендер әртүрлі адамдардың жануарларынан құралады — бірінде төрт түйе, екіншісінде екі түйе болады. Ал Қазақстанда мың түйенің бәрі бір адамның иелігінде. Бұл — рекордты шынымен де ерекше әрі бірегей етеді. Қазақстан мені таңғалдырды, енді бұл елге турист ретінде де келгім келеді, — деді ол.

Алматы облысының әкімі Марат Сұлтанғазиев те бұл оқиғаның ел үшін маңызын атап өтті.

— Рекордтың ресми түрде мойындалуы — біздің ұлттық рухымыз бен мәдени мұрамызға көрсетілген үлкен құрмет. Мың түйеден құралған керуен халықты біріктіріп, қазақ дәстүрінің символына айналды, — деді аймақ басшысы.

Идея авторы әрі керуен иесі, «Даулет-Бекет» ЖШС директоры Сыдық Дәулетов жобаны дайындауға жарты жыл уақыт кеткенін айтты.

— Түйе — еркіндікке үйренген жануар. Мың түйені бірге жинау оңай болған жоқ. Бірақ мақсат пен сенім болса, мүмкін емес дүние жоқ. Алдағы уақытта шұбат фестивалін өткізуді жоспарлап отырмыз. Халыққа осындай дәстүрімізді жаңғыртатын шаралар қажет, — деді ол.

Бұдан бұрын қыркүйекте әлемдегі ең үлкен түйе керуені Алматы облысы Іле ауданының Күрті ауылдық округінде жүріп өткенін жазғанбыз.