Ақтауда уланудан кейін жансақтау бөліміне түскен 9 жасар бала қайтыс болды

Ақтауда тамақтан уланып, жансақтау бөлімінде жатқан 9 жастағы бала қайтыс болды. Туыстарының хабарлауы бойынша, бала 6 қазанда көз жұмған, - деп хабарлайды Tengrinews.kz тілшісі Lada.kz-ке сілтеме жасап.

Жақындарының айтуынша, бала жансақтау бөлімінде көз жұмған. Олар өлімге балықтан улану себеп болуы мүмкін деп есептейді, өйткені бала сол тағамнан кейін ауруханаға түскен.

Баламен бірге ауруханаға жатқызылған әкесі сауығып келеді. Отбасының тағы екі ересек мүшесі облыстық көпбейінді ауруханада ем қабылдап жатыр.

Медициналық мекеме жағдайға қатысты пікір берген жоқ. Басылым Маңғыстау облыстық денсаулық сақтау басқармасына сауал жолдаған.

Бұған дейін Мұнайлы ауданының үш ересек тұрғыны мен 9 жастағы баланың үйде ысталған балықты жегеннен кейін ауруханаға түскені хабарланған болатын. Науқастарда ауыр ботулизм белгілері байқалып, олардың барлығы жасанды тыныс алу аппаратына қосылған және ботулизмге қарсы сарысу алған еді.

Баланың отбасы бұған дейін Астана мамандарынан көмек сұраған болатын. Туыстары Ақтауға республикалық деңгейдегі дәрігерлерді жіберуді және баланы санавиациямен тасымалдау мүмкіндігін қарастыруды өтінген еді.

Бізді Google-дың негізгі дереккөздер тізіміне қосыңыз