Қарақұрт шаққаннан кейін қазақстандық әйел жансақтау бөліміне түсті

Ақтөбе тұрғыны қарақұрт шаққаннан кейін әрең дегенде аман қалды. Туыстарының айтуынша, бірнеше сағат бойы дәрігерлер остеохондроз деп күдіктеніп, әйелдің жағдайы күрт нашарлағанша соған сәйкес ем жүргізген. Жансақтау бөліміне ауыстырғаннан кейін ғана оған уға қарсы екпе салынған, деп хабарлайды Tengrinews.kz тілшісі.

Ақтөбе тұрғыны қарақұрт шаққаннан кейін әрең дегенде аман қалды. Туыстарының айтуынша, бірнеше сағат бойы дәрігерлер остеохондроз деп күдіктеніп, әйелдің жағдайы күрт нашарлағанша соған сәйкес ем жүргізген. Жансақтау бөліміне ауыстырғаннан кейін ғана оған уға қарсы екпе салынған, деп хабарлайды Tengrinews.kz тілшісі.

Оқиға 28 маусымда болған. Зардап шеккен әйелдің әпкесі Файруза Фероздың айтуынша, 48 жастағы Эльвира Опина жеке үйінің ауласында жұмыс істеп жүрген кезде кенет аяғында қатты ауырсыну сезген. Бірнеше минуттан кейін оның жағдайы күрт нашарлап, белі мен төменгі іш аймағында қатты ауырсыну пайда болып, қан қысымы күрт көтерілген.

"Іші мен белі қатты ауыра бастады. Ауырсынудан денесі құрысып қалды. Бұған дейін оны бірдеңе шаққанын айтқан", - деді зардап шеккен әйелдің әпкесі.

Туыстары жедел жәрдем шақырған. Әйел ауруханаға жеткізілгенімен, жақындарының айтуынша, дәрігерлер оның жағдайының себебін бірден анықтай алмаған. Туыстарының сөзіне қарағанда, бастапқыда пациентке "остеохондроз" диагнозы қойылып, қалалық көпсалалы аурухананың неврология бөліміне жатқызылған. Ол жерде 7 сағаттан аса уақыт жатып, жағдайы одан әрі нашарлай берген.

"Түнгі бір шамасында әпкем маған хабарласып, таңға дейін аман қалмайтынын айтты. "Балаларыма қараңдаршы" деп өтінді. Мен қатты шошып кетіп, неврология бөліміне қоңырау шалдым, дәрігермен байланыстыруды талап еттім. Бірнеше рет телефон соқтым. Ақыры дәрігерге жетіп, қатты ұрыстым. “Сіз дәрігерсіз ғой, қалай бұлай болады? Оның белгілері қарақұрт шаққанға ұқсайды, қатты қиналып жатыр, қысымы 200, ал сіз оны жай палатада ұстап отырсыз” дедім. Содан кейін ғана оны жансақтау бөліміне ауыстырды", - деді Файруза Фероз.

Туыстарының айтуынша, жансақтау бөліміне ауыстырғаннан кейін әйелге қарақұрт уына қарсы екпе салынған. Кейін отбасы науқастың киімінен өлі өрмекшіні тауып, киімдерімен бірге өртеп жіберген.

Аурухана мәліметінше, пациент түскен кезде бел аймағындағы қатты ауырсынуға шағымданғандықтан, оған алдын ала "остеохондроз" диагнозы қойылып, неврология бөліміне жіберілген. Кейін бақылау барысында улану белгілері байқалып, әйел шұғыл түрде жансақтау бөліміне ауыстырылып, антидот енгізілген.

"Негізінен алдымен шаққан жерде ауырсыну болады. Біраз уақыттан кейін ісіну, қызару пайда болып, ауырсыну күшейеді. Бұл пациентте түскен кезде ісіну де, қызару да болмаған. Бұл белгілер кейін динамикалық бақылау кезінде пайда болды. Содан кейін қарақұрт шаққанын емдеу басталды", - деді Ақтөбенің №1 қалалық көпсалалы ауруханасының басшысы Қадырбек Иманбаев.

Қазір пациент жансақтау бөлімінен жалпы палатаға ауыстырылған. Дәрігерлердің айтуынша, оның жағдайы қанағаттанарлық, әйел сауығып келеді.

Посмотреть эту публикацию в Instagram

Публикация от Служба информации "Рика ТВ" (@fakt_taulik_aktobe)

Медицина қызметкерлері бұл биыл Ақтөбеде қарақұрт шаққаны расталған алғашқы жағдай екенін хабарлады.

Сілтемесіз жаңалық оқисыз ба? Онда Telegram желісінде парақшамызға тіркеліңіз!

Google News арқылы жаңалықтарымызды қадағалаңыз