Ақтөбе облысында ауылдың шаруа қожалықтарына мамандар керек

Ақтөбе облысында шалғай елді мекендердің шаруа қожалықтары білікті маман таппай отыр, деп хабарлайды 24KZ. Малға қарайтын бақташы, техниканы тізгіндейтін механизатор секілді жұмысшы мамандар жетіспейді. Дүкен ауылының тұрғындары мен билік өкілдері көпбалалы отбасыларды көшіп келуге үгіттеп жүр. «Қоныс аударуға ниеттенген жандар болса, баспана мәселесін шешеміз», – дейді жауаптылар.   

Үй бар, жұмыс та бар, бірақ адам тапшы. Ақтөбе облысының Дүкен ауылында шаруашылыққа да, мектепке де маман жетіспейді. Шалғайдағы елді мекенде жиырмадан астам отбасы тұрады. Негізгі күнкөріс көзі – мал шаруашылығы. Тұрақты жалақы беретін жұмыс орындары ретінде ауыл мектебі және «Ырғыз–Торғай» мемлекеттік табиғи резерваты ғана. Соған қарамастан ондаған шаруа қожалығы тіркелген. Жұмыс істеймін деген жан нәпақасыз қалмайды деуге болады. Бірақ бақташы, шөп шабатын механизатор тапшы.

Мамырбек Бектұрғанов, шаруа қожалығының басшысы:

- Жаз ортасында, шөптің маусымы кезінде совхоз орталығынан, аудан орталығынан тракторист іздеп, шөп шаптырамыз. Бақташы қазір келмейді. «300 мың айлық беремін» десең де келмейді. Ауылдың жастарының барлығы қалада ғой енді.

Ауылдағы шағын жинақты негізгі мектеп те бар-жоғы 22 бала оқиды. Бұл министрлік бекіткен нормативтен төмен көрсеткіш. Оқу ордасын сақтап қалу үшін жергілікті жұрт көпбалалы отбасыларын ауылға көшіп келуге үгіттеп жүр. Қажет болса, баспана да, мал да беруге дайын. Дегенмен туған жерін таңдаған жастар да бар. Солардың бірі – осы мектептің түлегі Айшолпан Ерболқызы. Ол Ақтөбедегі медициналық колледжді аяқтап, ауылға медбике болып қайта оралған. Себебі Дүкенде медициналық қызметкер мүлде болмаған.

Айшолпан Ерболқызы, Дүкен ауылдық негізгі мектебінің медбикесі:

- Егер жастар бірауыздан жұмылсақ, ауылды өркендетуге болады деп ойлаймын. Әрқайсысы өз мамандық иесі бойынша келіп, өзінің жұмысын атқарса, бұл ауыл әлі де көркейеді, әлі де дамиды.

Қазірдің өзінде мектеп пен ауылға бірнеше бос жұмыс орны керек. Ал баспана басты проблема емес. Тұрғындар қаңырап қалған үйлерді сүріп тастамай, жөндеп беруге әзір. Қарттар да жастарды ауылға тарту үшін әлеуметтік жағдайды жақсарту керектігін айтады. Сонымен бірге көгілдір отынның жоқтығы жаңа отбасыларды тартуға кедергі болып тұр.

Серімжан Жұбаназар, зейнеткер:

- Мына Нұраның орталығында үйді жылытуға газ келіп тұр. Жақын жерде болған соң осы газ мәселесі шешілсе, ол да жастарды тартуға жасалған жағдайдың бір түрі деп ойлаймын.

Ырғыз ауданының әкімі Нұрлан Қызбергенов: «Ауылдағы маман тапшылығын шешу үшін алдымен жұмысшы мамандықтардың мәртебесін заң жүзінде көтеру керек», – дейді. Шопан, бақташы, жылқышыларға әлеуметтік жеңілдіктер қарастырылса, ауылға келемін деушілер көбейеді деген пікірде.

Нұрлан Қызбергенов, Ырғыз ауданының әкімі:

- Келісімшартқа отырып, 5 жыл мал бағады ма, 10 жыл мал бағады ма, соның бір шектеуін қойып, 15 жылдан кейін сол малшыға аудан орталығынан үй салып беру жөніндегі жеңілдіктер болса, осындай мәселелер шешілсе, ғана өзінің оң нәтижесін береді деп ойлаймын.

Бір ғасырдан астам тарихы бар Дүкен ауылы тұрғындары болса өркениет игілігіне ғана иек артып отыр. Елді мекенге табиғи газ тартылып жол салынса, мәселе шешімін табатынына сенімді.

Президенттің тапсырмасымен басталған «Орталық – Батыс» автожолы дәл осы Дүкен ауылының үстінен өтеді. Сондықтан жергілікті атқарушы билік өкілдері де, тұрғындар да: «Елді мекеннің болашағы бар», – дейді. Күрежол тапсырылған соң сексен көлдің ортасында отырған ауыл халқы туризмді дамытуды көздейді.

Авторлары: Мансұр Есқожин, Болатбек Молдағалиев, Айбек Даутов