Ақтөбеде еріктілер ыстық шай таратты

Ақтөбеде еріктілер қар күреп жүрген коммуналдық қызмет жұмысшыларына ыстық шай таратты. Өңірде соңғы күндері саршұнақ аязға үскірік жел қосылып сынап бағанасы күрт төмендеген. 

Соған қарамастан жастар шаһарды қардан тазалап жүрген жандарға қайырымды қолдау көрсетті. 

Сақылдаған аяз өңірді өткен жексенбіден бері құрсап алды. Сынап бағанасы минус 17 градусты көрсеткенімен өңменнен өтетін өткір желмен бірге минус 30-35 градусқа дейін түседі. Жаяу жүргіншілер жолындағы қар сіресіп, көктайғаққа айналған. Техника жүрмейтін тар жолдағы мұздақты коммуналдық қызмет жұмысшылары ойып жүр. 

Бейбіт Қарақойшина, коммуналдық компания жұмысшысы:

- Таңғы 08:00-де басталады. Содан таңертеңнен беске дейін жұмыс істейміз. Өзіміздің көшелерде жүреміз. Есет батырда, Алақайда. Сондай көшелерде қар тазалаймыз. Жұмыс талғамаймыз. Түнде де шығамыз.

Ертелі-кеш үзіліссіз еңбек етіп жүрген жандарға еріктілер ыстық шай мен бауырсақ таратты. Көпшіл жастар игі істі аяздың беті қайтқанша үздіксіз өткізуді көздейді.

Оңдасын Бисенбі, ерікті:

- Негізі менің түйген ойым ,бұл қоғамның тазалығы – тек қана көше тазалаушыларға ғана емес бүкіл қоғамның жауапкершілігі болып табылады. Біз Ақтөбе жастары болып әр мезгіл сайын көше тазалаушыларға келіп қар аршысып, шай таратып, бауырсақ таратып, жазда «Жасыл Ел» қоғамдық бірлестігі болып Қазақстанның тазалығына үлкен атсалысамыз.

Ақтөбе қаласының тазалығына жауапты 21 мердігер мекеме бар. Арнаулы техникадан бөлек 600-ге жуық жұмысшы жаяу жүргіншілер жолын күтіп ұстайды. Олар 22 млн шаршы метр аумақтың қарын аршуы тиіс. 

Бибата Боқаева, коммуналдық компания шебері:

- Бізде жылы газель тұрады, екі жеңіл көлігіміз бар. Соның ішінде ауық-ауық қатты аяз болса, енді бүгін мен кеше ғой енді. Ал қалған күндері жылынуға тек түс кезінде ғана жинаймыз. Үйлеріне жаткізіп тастайтын машиналарымыз бар, таңертеңгілік жинайтын. Алайда енді жұмыстың реті осындай болғаннан кейін амал жоқ балаларды жұмысқа шығарамыз. 

Синоптиктер үскірік жел мен саршұнақ аяз алдағы аптаның соңына дейін болады деп болжап отыр. Сондықтан қайырымды жандардың қайырлы ісі жалғасын таба бермек. 

Авторлары: Мансұр Есқожин, Айнадин Молдабеков, Айбек Даутов