Ақтөбеде Сыбайлас жемқорлыққа қарсы көшбасшы мектебі форумы өтті

Ақтөбеде «Сыбайлас жемқорлыққа қарсы көшбасшы мектебі» республикалық форумы өтті.

Шарада еліміздің 4 өңірінен жиналған жастар бас қосты. Қоғам белсенділері сыбайлас жемқорлықпен күрестің заманауи әдіс-тісілдерін талқылап, экономикалық қылмысқа қарсы іс-қимылдың халықаралық және отандық тәжірибесін талдады.

Ақтөбе облысы тұрғындарының 28 пайызы жастар. Ал, олардың мемлекеттік қызметтегі үлесі 37 пайыз. Сондықтан бүгінгі өскелең ұрпақ қоғамда сыбайлас жемқорлыққа қарсы саясатты жүзеге асырудағы негізгі қозғаушы күштің біріне айналған.

Нұржан Шаңғытбаев, «Атамекен» жастар қоғамдық бірлестігінің төрағасы:

- Жаз бойы біз 12 аудан бойынша халықпен кездестік. Осы қоғам белсенділері бар, біздің сыбайлас жемқорлыққа қарсы волонтерлаерімізбен бірге көптеген мәселелердің шешімін таптық. Айта кететін болсақ, жол мәселесі халықтың көтеретін, Ұзақ мерзімде бітпей тұрған үйлеріміз бар, ФОК-тарымыз бар. Сондай мәселелерді шешуге ықпал етіп жүрген біздің жастарымыз.

Бүгінгі форумға 250-ге жуық делегат қатысты. Ақтөбе жастары өңірде жүзеге асқан жобаларды тілге тиек етсе, пленарлық отырыста өзге өңірлерген келген қоғам белсенділері жемқорлықты жоюда атқарған нәтижелі тәжірибесімен бөлісті.

Бауыржан Заки, БҚО қоғамдық кеңесінің мүшесі:

- Құзіретті органдар бар: аудит, прокуратура, антикор, біз сияқты қоғам белсенділері бар, депутаттар да араласып отырады. Олардың барлығы да тексеріс жасап, бақылап отырғанымен олардың әлеуеті кейде әлсіз. Менің ойымша, құзіретті органдардың кейде шамасы жетпей жатады. Сондықтан да қоғамдық бақылау жасауды кез келген қарапайым азаматқа, оның ішінде ауылдың жастарына және қаланың белсенділеріне үйрету. Егер халық болып жасайтын болсақ бұл коррупцияның нағыз профилактикасы болып жасалады. 

Басқосудың түпкі мақсаты – заң мен тәртіп үстемдігін әлсірететін жемқорлыққа мүлдем төзбеушілік мәдениетін орнықтырып, оны өскелең ұрпақтың бұлжымас әдебі ету. Шара аясында әлеуметтік кеселмен күресте тың бастамалар көтеріп, тапқырлығымен және табандылығымен көзге түскен қоғам белсенділері мен еріктілерге құрмет көрсетіліп, арнайы марапаттар табысталды.

Мансұр Есқожин, Айнадин Молдабеков, Айбек Даутов