Ақтөбеде тәртіптік жазаға келіспеген мемлекеттік қызметшілер әкімді сотқа берді

Іс Шалқар аудандық сотында қаралды. Талап қоюшылар Шалқар аудандық ішкі саясат бөлімінің басшысы Нұрсұлтан Қаниатов, Шалқар аудандық кәсіпкерлік және ауыл шаруашылығы бөлімінің басшысы Марғұлан Досжанов. Ал жауапкер – Шалқар ауданының әкімі Жанболат Жидеханов. Талап қоюшылар «тәртіптік жазаларды заңсыз деп тану, күшін жою туралы» өтініш түсірген.

Сот кабинетіндегі ақпаратқа сүйенсек, Шалқар аудандық прокуратурасы Мемлекеттік сатып алу заңнамасының орындалуын тексереді. Сол кезде Шалқар аудандық кәсіпкерлік және ауыл шаруашылығы бөлімі жосықсыз деп танылған «Дубровко» жеке кәсіпкерін, Шалқар аудандық ішкі саясат бөлімі «Лашын» жеке кәсіпкерін арнайы реестрге енгізбегені белгілі болды. Салдарынан олар Мемлекеттік сатып алу конкурсына қатысып «Дубровко» ЖК 11 рет, ал «Лашын» ЖК 8 рет жеңімпаз атанған.

Прокуратура Шалқар ауданының әкімі Жанболат Жидехановқа кінәлі қызметкерлерге шара қолдануды ұсынған. Әдеп кеңесі «қызметке толық сәйкес емес түріндегі ескерту» тәртіптік жазасын қолданды.

Сот отырысында анықталғандай, «Дубровко» жеке кәсіпкері 2024 жылдың мамыр айында, «Лашын» жеке кәсіпкері сәуір айында жосықсыз деп танылған. Сот отырысына М.Досжанов, Н.Қаниатов қатысқан. Шалқар аудандық ішкі саясат бөліміне түпкілікті сот шешімі пошта және сот кабинеті арқылы 2025 жылдың наурыз айында жолданған. Басшы хатты арада екі ай өткенде ашып оқыған.

Ал «Дубровко» жеке кәсіпкері жосықсыз қатысушылардың тізіліміне арада 1 жыл 3 ай өткен соң, 2025 жылдың 31-шілдесінде енгізілген.

Сот Нұрсұлтан Қаниатовтың, Марғұлан Досжановтың талабын қанағаттандырудан бас тартты. Шешімге келіспесе бір ай ішінде апелляциялық шағым түсіре алады.

Еске салсақ, былтыр қыркүйек айында Ақтөбеде жосықсыз мердігерді тізімге енгізбеген мемлекеттік қызметшілер жазаланады. Тізімге енбеген кәсіпкерлер қайтадан Мемлекеттік сатып алу конкурсына қатысып, 8, 11 рет жеңімпаз атанған. Әдеп кеңесі шенеуніктерді қызметіне толық сай емес деп дауыс берді.