Ақтөбедегі теракт: 10 жыл бұрынғы қанды қылмысқа қатысты тың дерек шықты

10 жыл бұрын Қазақстанды дүр сілкіндірген Ақтөбедегі терактқа қатысты жаңа мәліметтер белгілі болды. Аталған іс бойынша сотталған үш адамның жазасын өтеу кезінде көз жұмғаны хабарланды, деп хабарлайды Arasha.kz.

2016 жылғы 5 маусымда Ақтөбе қаласында радикалды топ бірнеше нысанға шабуыл жасады. Алдымен олар "Паллада" қару-жарақ дүкеніне басып кіріп, сатушыны өлтіріп, күзетшіні жаралаған. Осыдан кейін қылмыскерлер қару-жарақты иемденіп кеткен.

Террористердің қолына кемінде 17 атыс қаруы, 3 газ тапаншасы, сондай-ақ оқ-дәрілер мен пышақтар түскен.

Бір сағаттан кейін шабуылдаушылар екі топқа бөлінген.

Бірінші топ ұрланған патрульдік көлікпен "Пантера" дүкеніне шабуыл жасап, екі келушіні пышақтаған. Соның салдарынан бір адам қаза тауып, екіншісі аман қалған.

Полиция келген кезде атыс басталып, үш шабуылшы сол жерде жойылды. Біреуі жараланып ұсталды, тағы екеуі қашып кеткенімен, кейін олар да жойылды.

Осы уақытта екінші топ маршруттық автобусты басып алып, жолаушыларды түсіріп, сол көлікпен Ұлттық ұланның әскери бөліміне кірген. Онда әскери қызметкерлер мен полицейлермен қақтығыс болған.

Нәтижесінде үш әскери қызметкер қаза тауып, алты адам жараланған.

Оқиғадан кейін қалада ауқымды арнайы операция жүргізілді. Қоғамдық көлік қозғалысы тоқтатылып, тұрғындарға көшеге шықпау ескертілді. Байланыс пен интернет уақытша шектелді.

Қазақстанда 40 тәулікке террористік қауіптің сары деңгейі енгізілді.

Жалпы шабуыл салдарынан 25 адам қаза тапты. Оның ішінде 4 бейбіт тұрғын, 3 әскери қызметкер және операция барысында жойылған 18 террорист бар.

Аталған іс бойынша барлығы 29 адам кінәлі деп танылды. Оның ішінде 9 адам негізгі қатысушы ретінде сотталды. Жеті адам өмір бойына бас бостандығынан айырылды.

Tengrinews.kz редакциясы ІІМ Қылмыстық-атқару жүйесі комитетіне ресми сұрау жолдаған. Алайда сотталғандардың қайда отырғаны мен немен айналысатыны туралы нақты жауап берілмеген.

Дегенмен ведомство үш сотталған адамның қайтыс болғанын растады.

"Сотталғандар Айдос Жұбанов, Асхат Иманғалиев, Асхат Рахметов қайтыс болды", – делінген ресми хабарламада.