Ақтөбедегі жеке үйдің ауласында жұмбақ жағдайда ыстық бастау пайда болды

Ақтөбедегі Жүргенов көшесінде орналасқан жеке үйлердің бірінде бірнеше айдан бері кәдімгі салқын судың орнына ыстық су ағып тұр. Үйде орталық су құбыры жоқ, сондықтан үй иесі сонау 98-ші жылы ұңғыма бұрғылаған. Ол жерден ыстық су шыға бастағанда, үй иесі оны емдік су деп топшылаған, деп хабарлайды Tengri Life "Диапазон" басылымына сілтеме жасап.

Зейнеткер Ляззат Рахманованың үйіне күн сайын айналадағы ауылдардан, тіпті өзге қалалардан "ғажайып суды" толтырып алу үшін адамдар ағылып келеді. Оның айтуынша, судың ыстықтығы сондай, тіпті күйіп қалуға болады.

Ішуге немесе жуынуға қажетті суды алдын ала ыдыстарға құйып алып, суытып қояды. Фото: Сәуле Мұрат/"Диапазон"

"Мен оны сатпаймын, ешкімге де бетін қайтарған емеспін. Кейбіреулер балаларға балмұздақ пен тәтті-дәмдіге деп ақша тастап кетеді, рақмет. Ұңғымадан ыстық су шыққанда, мұны жоғарыдан келген сый деп шештім. Бірақ ішуге жарамды ма, жоқ па, соны білу үшін сараптамаға өткіздім. Зертханада суды зерттеп, оның құрамында зиянды қоспалар жоқ, ішуге болады деген қорытынды берді. Ал емдік қасиеті туралы ол жерде ештеңе айта алмады", - дейді үй иесі.

Суды ішу үшін үй иесі оны алдымен суытып алады. Оның айтуынша, көршілес екі үйдегі ұңғымалардан да осындай ыстық су шығып жатыр екен. Ляззаттың туыстары үйдің астында термальды бұлақ бар және судың емдік қасиеті болуы мүмкін деп ұйғарған. Олар суға келе бастаған, кейін басқалар да ести бастапты.

"Басында судың бұл күйі уақытша шығар, қайта суып кетер деп ойладық. Бірақ бір жылға жуықтады, су тек ысып барады. Оның бойында емдік қасиет бар деп ойлаймын. Аулаға бір-екі себезгі кабинасын орнатқым келеді, сонда емделгісі келетіндер шомыла алар еді", - дейді зейнеткер.

Ляззат Рахманова Санитариялық-эпидемиологиялық бақылау комитеті Ұлттық сараптама орталығының филиалы берген құжаттарды көрсетті. Онда судың сапасы ішуге жарамды екені жазылған. Фото: Сәуле Мұрат/"Диапазон"

Дегенмен, мамандар тіршілік нәрінің емдік қасиетіне күмәнмен қарайды және үйдің астында термальды бұлақтың болуы мүмкін емес дейді.

"Біздің өңірде термальды сулар кемінде 1000 метр тереңдікте орналасқан. Шалқарда 800 метрлік ұңғыма бұрғылағанбыз, соның өзінде судың температурасы 32 градус болды. Суы емдік саналатын және адамдар әлі күнге дейін емделуге баратын Құланды түбегінде (Қызылорда облысы) ұңғымалар кеңес заманында бұрғыланған, ол жақта да су өте тереңде жатыр. Ал қалада... Егер бұл ыстық су құбырынан немесе жылу трассасынан кеткен ақау болмаса, басқасын білмеймін. Ол жақтан аққан су жер қабатына өтуі мүмкін. ЖЭО-дан келетін ыстық су бізде де ауыз су болып саналады", - деді 54 жылдық тәжірибесі бар гидрогеолог, ҚР Минералды ресурстар академиясының академигі, "Ақпан" ЖШС басшысы Азамат Дүйшекенов.

Оның айтуынша, Ақтөбеде шамамен 300-400 ұңғыма бұрғыланған, олардың тереңдігі 10 метрден 80 метрге дейін барады және еш жерде термальды су жақын орналаспаған.

"10 метр тереңдікте оның болуы тіпті мүмкін емес. Біздің ұңғымалардан шығатын судың температурасы максимум 9-дан 12 градусқа дейін болады. 700-800 метр тереңдікте жылы су болуы мүмкін, бірақ оның өзі 30 градус шамасында", - деп түсіндірді маман.

"Aqtobe su-energy group" АҚ-да Жүргенов және Алтынсарин көшелерінің қиылысында сыртқы жылу желілері өтетінін хабарлады. Бұл учаскеде жылу желілері мен су құбыры желілерінің қиылысуы (параллель төселуі) жоқ. Сонымен қатар жылу желілері темірбетон каналдардың (науалардың) ішіне төселген, бұл олардың су құбыры желілерімен тікелей жанасуын толықтай жоққа шығарады. Сыртқы жылу желілерінің әсерінен салқын судың ысуы мүмкін емес.

Зейнеткердің үйіндегі сорғы неліктен жер астынан салқын судың орнына ыстық су тартып жатқаны әзірге түсініксіз. Судың шынымен де емдік қасиеті бар-жоғын тек Курортология ғылыми-зерттеу институты анықтай алады, дейді сарапшылар. Бірақ әзірге ол жаққа ешкім сараптамаға тапсырыс бермеген.

Google News арқылы жаңалықтарымызды қадағалаңыз