Германияда ұшақ жұмбақ жағдайда апатқа ұшырады

Нидерландыдан ұшып шыққан Cessna 172 шағын ұшағы Германияда апатқа ұшырады. Әуе кемесі екі ел шекарасына жақын маңдағы егістікке құлаған. Борттағы үш адамның бәрі қаза тапты, деп хабарлайды Tengri Travel DutchNews сайтына сілтеме жасап.

Не болды?

Басылым мәліметінше, оқиға Эркеленц ауданында, Германия-Нидерланды шекарасы мен Рурмонд қаласына жақын жерде болған. Cessna 172 ұшағы Хильверсум аэродромында орналасқан Vliegschool Hilversum ұшу мектебіне тиесілі.

Ұшуды бақылау жүйелерінің деректері бойынша, ұшақ Хильверсумнан 14 қыркүйек күні сағат 10:25-те ұшып шыққан. Шамамен 53 минуттан кейін, сағат 11:18-де әуе кемесі Эркеленц ауданында радардан жоғалып кеткен.

Ұшақ Гердерат елді мекенінің маңындағы егістікке құлаған.

Желіде оқиға орнынан алғашқы кадрлар пайда болды. Онда құтқарушылардың апатқа ұшыраған ұшақ сынықтарын жинап жатқаны көрінеді.

Жергілікті полиция бортта болғандардың үшеуі де оқиға орнында көз жұмғанын хабарлады.

Кейінірек Нидерланды Сыртқы істер министрлігі қаза тапқандардың кім екенін растады. Олар: Сюдвест-Фрисландиядан келген 57 жастағы ер адам, сондай-ақ Амстердамның 58 жастағы тұрғыны мен 23 жастағы қыз. Олардың туыстарына қайғылы жағдай туралы хабарланды.

Vliegschool Hilversum ұшу мектебі апатқа ұшыраған ұшақ өздерінің әуе кемелерінің бірі екенін растады.

"Германияда біздің Cessna 172 ұшақтарымыздың бірі апатқа ұшырағанын ауыр өкінішпен хабарлаймыз. Оқиғаның мән-жайы әзірге белгісіз", - делінген мектеп мәлімдемесінде.

Оқиғадан кейін мектеп барлық ұшу жұмыстарын тоқтатты. Бұл шешім апаттың себептерін тергеу жұмыстарына байланысты қабылданып отыр.

Ұшақтың неліктен құлағаны әзірге белгісіз. Сондай-ақ ұшудың нақты бағыты мен мақсаты анықталып жатыр.

Германиялық БАҚ-тың хабарлауынша, ұшақ Германияның оңтүстігіндегі Фрайбург қаласына бағыт алған болуы мүмкін. Германияның әуе қозғалысын басқару қызметі апат алдында ұшқыштың ауа райының қолайсыздығына байланысты ұшу ақпараттық қызметімен байланысқа шыққанын хабарлады.

Осыдан кейін ұшақ биіктікті жоғалта бастап, соңында егістікке құлаған. Бақылау деректері де құлар алдында әуе кемесінің бағыты, жылдамдығы мен биіктігі өзгергенін көрсетеді.

Дегенмен билік әзірге қолайсыз ауа райын апаттың негізгі себебі ретінде атаған жоқ. Оқиғаның нақты мән-жайы әлі анықталуы тиіс.

Тергеумен Германия мен Нидерландының авиациялық оқиғаларды зерттеу жөніндегі мамандары айналысып жатыр.

Олар ұшақ құлар алдында не болғанын және әуе кемесінің неліктен биіктікті жоғалтқанын анықтауы керек.

Апаттың нақты себебі әлі анықталған жоқ.

Тағы оқыңыз: Танымал әнші мінген ұшақ қонғаннан кейін өртеніп кетті: алғашқы кадрлар

Бізді Google-дың негізгі дереккөздер тізіміне қосыңыз