Арғын Нығматулин әлі де іздеуде Бас прокуратура

Ағайынды Нығматулиндер әулетінің үлкені — Мәжілістің бұрынғы спикері Нұрлан Нығматулин мен экс-сенатор Ерлан Нығматулиннің ағасы Арғын Нығматулин әлі де іздеуде жүр. Бас прокурордың орынбасары Ғалымжан Қойгелдиев осыған қатысты түсініктеме берді, деп хабарлайды Arasha.kz сайты ҚазТАГ агенттігіне сілтеме жасап.

«Арғын Нығматулинге қатысты айтарым: иә, дұрыс, Қарағанды облысының хоккей клубына бөлінген ақшалай қаражатты жымқыру дерегі бойынша қылмыстық іс қозғалды. Ол іздеуде.  Біз бұл мәселемен айналысып жатырмыз», — деп жауап берді сәрсенбі күні Мәжіліс кулуарында Бас прокурордың орынбасары Ғалымжан Қойгелдиев.

Нұрлан Нығматулин 2022 жылғы Қаңтар оқиғасынан кейін, 1 ақпанда Мәжіліс спикері қызметінен кетті. Ол төменгі палатаны 2016 жылдан бері басқарып келген болатын (бұл оның екінші төрағалығы еді, бұған дейін 2012-2014 жылдары спикер болған). Сондай-ақ әр жылдары Президент әкімшілігін басқарып, Қарағанды облысының әкімі болды.

Ерлан Нығматулин — Нұрлан Нығматулиннің егізі. Ол да Мәжіліс пен Сенатта депутаттық креслода отырған.

Арғын Нығматулин — олардың үлкен ағасы, Қарағанды облыстық мәслихатының бұрынғы депутаты.

Ағайынды Нығматулиндерге қатысты рейдерлік басып алу, қылмыстық құрылымдар мен схемаларға қатысы бар болуы мүмкін, сондай-ақ қылмыстық істерді қолдан ұйымдастыру туралы айыптаулар бірнеше рет айтылған болатын. Дегенмен ағайындылар әлі күнге дейін бостандықта жүр.