Армия мен бітімгерлерге арналған ұшақ: Қазақстанға екінші Airbus A400M келді

Алматыға Испаниядан Әуе қорғанысы күштеріне екінші ауыр әскери-көлік Airbus A400M Atlas ұшағы жеткізілді. Әуе кемесі Қазақстанның әскери-көлік авиациясының мүмкіндіктерін кеңейтеді, деп хабарлайды Tengrinews.kz Қорғаныс министрлігіне сілтеме жасап.

A400M ұшақтары қорғаныс міндеттерін орындаумен қатар, төтенше жағдайлардың салдарын жою, халықты эвакуациялау және гуманитарлық көмек жеткізу мақсатында да пайдаланылуы мүмкін.

"Әскери-көлік авиациясын қолданудың тағы бір маңызды бағыты қазақстандық әскери қызметшілердің халықаралық бітімгерлік миссияларға қатысуын қамтамасыз ету болмақ. Мұндай санаттағы ұшақтардың болуы ұлттық бітімгерлік контингентті өз күшімен тасымалдау мүмкіндігін кеңейтеді", - деп хабарлады қорғаныс ведомствосы.

Жаңа авиациялық техниканы пайдалануға қазақстандық экипаждар мен инженерлік-техникалық персонал дайындалды. Олар Испанияның Севилья қаласындағы Airbus оқу орталығында теориялық және практикалық даярлықтан өтіп, әуе кемелерін басқару, пайдалану және техникалық қызмет көрсету ерекшеліктерін меңгерді.

Airbus A400M әскери-көлік ұшағы Қазақстан, Түркия, Германия, Малайзия, Индонезия, Франция, Ұлыбритания, Испания, Бельгия және Люксембургпен қоса, он елдің қарулы күштерінде қолданылады.

"Бұл ұшақ ауыр әскери техниканы алыс қашықтыққа тасымалдаумен қатар, қысқа әрі арнайы жабын төселмеген ұшу-қону жолақтарына да қонуға мүмкіндік береді. Осылайша, Қазақстан Қарулы күштерінің мүмкіндіктерін кеңейтуге ықпал етеді", - деп толықтырды Қорғаныс министрлігі.

Еске сала кетейік, Әуе қорғанысы күштері үшін сатып алынған алғашқы Airbus A-400M Қазақстанға 2024 жылдың аяғында жеткізілген болатын.

Жақында Қазақстанда соңғы Ан-26 әскери-көлік ұшағы қорытынды ұшырылымын жасады. ІІМ Ұлттық ұланы авиациясы қару-жарағында болған бұл әуе кемесі 44 жыл бойы қызмет етіп, осы уақыт ішінде 8400 сағат ұшқан.

Бізді Google-дың негізгі дереккөздер тізіміне қосыңыз