Артемида 2 миссиясының астронавттары Айдың арғы бетін көрсетті

NASA жүзеге асырып жатқан Artemis II миссиясының астронавттары Айдың арғы бетінің жаңа суретін жариялады. Кадр 7 сәуір күні NASA-ның Instagram парақшасында жарияланған, деп хабарлайды Arasha.kz.

Жаңа фотода оң жақта Жерден көрінетін Айдың жақын бөлігі, ал сол жақта адам көзіне көрінбейтін арғы беті бейнеленген.

NASA мәліметінше, жақын бетіндегі қара дақтар Айдың ерте кезеңдегі жанартаулық белсенділігінің нәтижесінде пайда болған. Ал лавалық ағындардың батысында орналасқан Ориентале бассейні – диаметрі шамамен 600 миль болатын алып кратер. Бұл кратер Айдың әрі жақын, әрі арғы бөлігін қамтиды. "Артемида-2" экипажы осы нысанды толық көрген алғашқы адамдар атанды.

Ғалымдар Айдың арғы беті Жерден көрінбейтінін оның өз осінен айналу жылдамдығы Жерді айналу жылдамдығымен сәйкес келуімен түсіндіреді.

Сонымен қатар астронавттар "Орион" ғарыш кемесімен Жерден ең алыс қашықтыққа – 407 мың шақырымға дейін ұшып, жаңа рекорд орнатты. Бұл көрсеткіш 1970 жылғы Apollo 13 миссиясы орнатқан рекордтан шамамен 6500 шақырымға артық.

Айдың арғы беті соңғы рет 1972 жылы Apollo 17 миссиясы кезінде көрсетілген болатын.

6 сәуір күні "Орион" кемесі Айдың тартылыс күші Жердің тартылысынан басым болатын аймаққа кірді. Сол сәтте кеме Айдан шамамен 63 мың шақырым, ал Жерден 232 мың шақырым қашықтықта болған.

Айта кетейік, "Орион" ғарыш кемесі 1 сәуір күні АҚШ-тың шығыс жағалауынан ұшқан. Бортта астронавттар Рид Уайзман, Виктор Гловер, Кристина Кох пен Канадалық ғарыш агенттігінің өкілі Джереми Хансен бар. Экспедиция барысында олар 10 күн ішінде Айды айналып ұшып, Жерге қайта оралуы тиіс.