Әскери комиссариатты өртемек болған оқушы 7 жылға сотталды

РФ-де Әскери сот Тверь облысының 14 жастағы тұрғынын әскери комиссариатты (военкомат) өртеуге әрекет жасағаны үшін жеті жылға тәрбие колониясына кесті, деп хабарлайды Arasha.kz.

2-ші Батыс округтік әскери соты Вышний Волочок қаласынан келген жасөспірімге қатысты үкім шығарды. Бұл туралы Тергеу комитетінің өкілдері мәлімдеді.

Сот оқушыны террорлық ұйымның қызметіне қатысқаны және террорлық акт жасауға оқталғаны үшін кінәлі деп таныды. Ол жазасын тәрбие колониясында өтейтін болады.

Тергеу мәліметтері бойынша, 2025 жылдың мамыр айында жасөспірім мессенджер арқылы Украинадан келген куратордан нұсқау алған. Оқушы жанармай құйылған үш шөлмек дайындап, әскери комиссариат ғимаратына бағыттаған. Алайда құқық қорғау органдарының қызметкерлері оны өрт қою әрекетіне дейін қолға түсірді.

Тергеу комитетінің мәлімдеуінше, кәмелетке толмаған бала Ресейде тыйым салынған террорлық ұйымның мүшесі болған.