Әскерилер спорттық жарыстардан 500 медаль еншіледі

Биыл әскерилер беделді халықаралық жарыстар мен республикалық біріншіліктерде 500 медаль еншіледі.

Оның 234-і алтын болса, 140-ы күміс. Қорғаныс министрі, авиация генерал-лейтенанты Дәурен Қосанов  жоғары жетістіктерге байланысты Спорт комитетінің жұмысын оң бағалады. Министр жүйелі жұмыстың нақты нәтижесі ретінде Алматы қаласында әскери-спорт колледжінің ашылуын, әскери қызметшілер арасында қазақ күресінен тұңғыш әлем чемпионатының өткізілгенін атап өтті. Сондай-ақ биыл Ұлттық олимпиадалық комитетпен, Оқу-ағарту министрлігі жанындағы Дене шынықтыру және спорт орталығымен және Моңғолияның қоян-қолтық ұрыс қауымдастығымен меморандумдарға қол қойылды. Айтулы спорттық жарыстарда топ жарған спортшылар марапатталды. Сонымен қатар әскер спортын дамытуға белсенді үлес қосып жүрген азаматтар мен спорт федерациялары, бұқаралық ақпарат құралдары және қоғамдық ұйымдардың өкілдеріне алғыс хаттар табысталды.

Замзагул Файзолланова, ҚР Қорғаныс министрлігі Спорт комитетінің спортшы-нұсқаушысы-капитан:

- Бүгін министр мырзадан осындай сыйақы-марапат алып жатырмын. Ол дегеніміз біздің болашақ жастарымыз бен өсіп келе жатқан іні-қарындастарымыз өте үлкен мотивация еленген еңбек, ақталған маңдай тер ғой. Сол еленіп жатқан еңбегімізді барша осы болуымызға себепші болған азамат пен азаматшаларға алғысымды айтамын.

Авторы: Құрманғали Асылжан