Аспаннан атақтың түр түрі домалап түсті

–   Қыстың сәні қар емес пе? –   дейді біздің әйел күңкілдеп.

–   Алақай, алақай, қар жауса, аққала жасаймыз! –   деп балалар қуанды. Осы сәтте теледидардан Тәуелсіздік күніне арналған марапаттау жүріп жатыр еді. Көріп жатып көзім ілініп кетті.

–   Ойбай,үйдің шатыры тарсылдап жатыр – деген қатты дауыс шықты. Бастапқыда далада қар емес, бұршақ жауған болар деп ойладық. Әйтеуір,тарсылы қатты. Жүгіріп сыртқа шықтық. О, тоба өз көзіме өзім сенбей тұрмын, көктен бұршақ емес, домалақ-домалақ ордендер мен медальдар жауып тұр. Біздің әйелдің есі шығып кете жаздады. Бағана теледидардан марапаттарды көріп, «шіркін, біреуін мен омырауыма жарқыратып қадап алсам ғой» деген еді. Әйел мектепте отыз жыл бойы еден жуады. Аспаннан атақтың түр-түрі домалап түсіп жатыр. Ақыры ол іздеп жүріп «Еңбегі сіңген еден жуушы» төсбелгісін тауып алды. Ауызы ыржиып мәз болды. Шешем «Үздік зейнеткер» орденін омырауына жапсырып үндемей тұр. Сүйтсем, ауылдың бәрі көшеде атақ теріп жүр. Ауыл әкімі Талтаңбай бір шелек атақты салып алып тұра қашты. Күнде араққа тойып жүретін Қопан «Маскүнемдер саласының үздігі» төсбелгісін жарқыратып тағып алыпты. Банктен несие алып, қарызға белшесінен батқан Қауғабай «үшінші дәрежелі борышкер» орденін төсіне тағыпты. «Ауылдың алаяғы» төсбелгісіне бірнеше адам таласып қалды. Полиция капитаны Аяған Сабағанов «Ұр,Тоқпақ» жүлдесін құшақтап тұр. Әркім өзі қалаған марапатқа қолы жетіп, атаққа қарық болды. Ал мен былтыр комиссия отырысында қаралған Жазушылар одағының төсбелгісін іздеп жүрмін. Талдың түбінде жатыр екен, енді еңкейіп ала бергенде, бір таныс ақын жігіт іліп әкетті.Тұра қудым.

–   Алақай, қар жауды, қар жауды! – деп айқайлаған баламның даусынан ұйқыдан оянып кеттім. Тәп-тәуір түс көріп жатыр екенмін. Қап, төсбелгімнің қолыма ілікпегеніне жыным келді. Ашуланып, ұлыма «неге ояттың?» деп айқайлап, шекесінен сарт еткіздім.

Нұрлыбек ЖҰБАТҚАН