Астана Опера қызметкерлері наурызнамада ұлттық киім киюге көшті

«Астана Опера» опера және балет театрдағы тігін цехының технологі Айгүл Рыспаева өнер ордасында «Абай», «Біржан – Сара», «Қыз Жібек», «Алпамыс», «Айсұлу» операсы, «Қаракөз» балеті секілді қойылымның қай-қайсындағы кастюм ұлттық нақышты, қазақылықты насихаттайтынын жеткізді.

– «Адам көркі шүберек» демекші театрымыздың сахнасындағы әр қойылымның киімі біздің қолдан өтеді. Жалпы әртістердің жарқырап шығуы, сахнаның көркін келтіру – біздің шеберханадағы қызметкерлердің арқасы. Біздің жұмыс тек киім тігумен емес, сахнадағы декорация, реквизит заттарын да жасаймыз.

Әр қойылымға дайындық суретшілерімізден киім үлгісінің эскизы келген беттен басталады. Тіпті, әр киім үлгісінің матасына дейін жеке таңдалады. Әрбір әртістің алдын-ала өлшемі алынып, матаға киім пішіледі. Олардың киім үлгісі дайын болғанға дейін біз 2-3 рет өлшем аламыз. Киімнің бүкіл өлшеу жұмысы, яғни оған қойылатын ою-өрнек, әшекей болсын, бәрін Кастюм суретшісімен келісіледі.

Бастысы әрбір әртіске киімі үстінде қонымды және ыңғайлы болуы тиіс. Балет киімі де денеге жағымды, қозғалысқа ыңғайлы матадан тігілгені абзал. Сол себепті де біз әр киімнің тігу барысында ыждахаттықпен қарап, қай-қайсысы заманына сай пішіп, тігілгенін қадағалаймыз. Өйткені әр қойылым, әр кезеңді суреттейді. Театрымыздың арқасында әлемге танымал атақты Кастюм суретшілерімен, технологтарымен, декораторларымен тығыз жұмыс істеп, тәжірибе алмасудан кем емеспіз. Соған қарай қолымыздан шыққан кастюмдер де талай елді аралап, әлемнің айтулы сахналарында шығуы – біз үшін үлкен мәртебе. Біз сахна арқылы өзге елдің мәдениет танып қана қоймай, қазақылығымызды көрсетіп, ұлттық құндылығымыз дәріптеп жүрміз, – дейді Айгүл Рыспаева.

Қазақстанның еңбек сіңірген қайраткері,  опера труппасының жетекшісі Татьяна Вицинская сахнада ән орындау арқылы елдің мәдениетін насихаттайтынын айтты.

– Біздің репертуардағы А.Жұбанов пен Л.Хамидидің «Абай», Е.Брусиловскийдің «Қыз Жібек», М.Төлебаевтың «Біржан – Сара»,  Е.Рахмадиевтің «Алпамыс» операларындағы қазақ қыздары мен аналардың бейнелері қазақ халқынының құндылығын, даналығын көрсетеді. Мысалы, «Абай» операсындағы «Тойбастар» концерттік нөмірін орындағанда өз басым сахнаға ұлттық костюммен шығамын. Өнер адамы ретінде өзімді шабыттандыра түседі. Бірде осы операмен Италия мен Ресейге гастрөлдік сапарға барғанбыз. Қойылымнан көрермендер қазақтың ұлттық киіміне, әсіресе, кимешек, сәукелеге қызығушылық танытты. Өзім қазақы қиімді қойылымда ғана емес, концерт те киемін. Маған көйлектердің еуропалық үлгісінің ұлттық ою-өрнек элементтерімен үйлесетіні өте қатты ұнайды.

Оның үстіне, күмістен жасалған ұлттық әшекей-бұйымды таққанды ұнатамын. Тіпті өзімнің жеке ерекше топтамам бар, оны әрдайым жаңа зергерлік бұйымдармен толықтырамын. Шетелге шыққан сайын сол әшекейлерімді алып жүремін. Бұл да ұлттық мәдениетімізді насихаттаудың өзіндік бір құралы ғой, – дейді жетекші солист Татьяна Вицинская.

Ал «Астана Операның» костюмдер бойынша дизайнері Дариға Тайшықова болса, ұлттық киімдерде сәндік-қолданбалы өнердің бай мұрасы, мәдени кодымыздың тұтас қабаты бейнеленгенін жеткізді.

– Киімнің пішіні мен пішімі, матасы, түсі, ою-өрнегі және зергерлік бұйымы арқылы адамның жасы мен отбасылық жағдайын белгіледі. Заманымыз өзгерді десек те, халықтың қазақы әдет-ғұрыптан ғана емес, ұлттық киімнен де қол үзбегенін байқауға болады. Бүгінде жас дизайнерлерлер ұлттық нақышты пайдалана отырып, заманауи техникамен үйлестіріп, тың дүниелерді қолданысқа әкеп жатыр. Бұл – қазақтың мәдени мұрасының сақтап, оған деген құрметтің артып келе жатқанының көрінісі, – дейді Дариға Тайшықова.