Астанада автосалон иесі клиенттерін сан соқтырды

Елордада автокөлік сату саласындағы ірі алаяқтық схемасы әшкереленді, деп хабарлайды Arasha.kz.

Қаланың 25 жастағы тұрғыны автосалон иесі бола тұра, менеджермен бірлесіп алаяқтық жасағаны анықталды. Бұған дейін автосалон комиссиялық негізде ескі автокөліктерді сатумен заңды түрде айналысып келген. Кейін бәрі өзгерген: автосалонда көлік иелерімен оларды сату туралы келісімшарттар жасалып, көліктер қабылданған және сатылған.

Алайда, сатылымнан түскен ақша заңды иелеріне берілмеген.

Бұған қоса, автокөлік сатып алу үшін ақша өткізген сатып алушылар да алданып қалған – себебі оларға көлік құралдары берілмеген.

Полиция көліктерді күдіктілердің пайдаланғанын және үшінші тұлғаларға жалға беріп отырғанын анықтады.

Аталған факті бойынша сотқа дейінгі тергеу амалдары жүргізілуде. Күдіктілер қамауға алынды. Олардың осыған ұқсас басқа да қылмыстарға қатысы бар-жоғы анықталуда.