Астанада баспанасыз азаматтарға көмек көрсетіліп жатыр

Елорданың Алматы ауданында нақты тұрғылықты жері жоқ азаматтармен жүйелі жұмыс жүріп жатыр. Жұмыс қажетті көмек көрсетуге және тұрғындардың қауіпсіздігін қамтамасыз етуге бағытталған. Бұл туралы елорда әкімдігінің ресми сайты жазды, – деп хабарлайды Aikyn.kz.

Алматы ауданы әкімінің аппараты аудандық полиция басқармасы және қалалық денсаулық сақтау басқармасымен бірлесіп, қолдауға мұқтаж азаматтарды анықтау және негізгі әлеуметтік мәселелерін шешуге жәрдемдесу бойынша іс-шаралар жүргізіп жатыр. Атап айтқанда, қажетті құжаттарды қалпына келтіруге және рәсімдеуге көмек көрсетіледі. 

Бұл азаматтарға алдағы уақытта ресми түрде жұмысқа орналасуға, әлеуметтік қызметтерге қол жеткізуге және өз бетінше өмір сүруге қайта оралуға мүмкіндік береді. Сонымен қатар азаматтардың медициналық тексеруден өтуіне жәрдем көрсетіледі. Бұл ықтимал ауруларды дер кезінде анықтауға, қажетті медициналық көмекке бағыттауға және жұқпалы аурулардың таралуына жол бермеу бойынша профилактикалық шараларды қабылдауға мүмкіндік береді. 

Аталған жұмыс санитариялық-эпидемиологиялық саламаттылықты, қоғамдық тәртіпті және қауіпсіз қалалық ортаны қамтамасыз етуге бағытталған. Мүдделі қызметтердің бірлескен жұмысы өмірлік қиын жағдайға тап болған адамдарға көмек көрсетіп қана қоймай, туындайтын әлеуметтік және санитариялық мәселелерді уақтылы шешуге бағытталған.

Сараптама, зерттеу мақала, күнделікті өзекті ақпаратты «Айқынның»   TELEGRAM  арнасынан табасыз.