Астанада конкур бәсекесі қызды: елдің үздік шабандоздары іріктеліп жатыр

Қатысушылар 120, 130 және 140 сантиметр биіктіктегі кедергілерден өту бойынша сынға түсіп жатыр, – деп хабарлайды Aikyn.kz сайты.

Ат спорты федерациясы бас хатшысының міндетін атқарушы Азат Толкунбековтің айтуынша, бұл жарыста еліміздің ең мықты шабандоздары бақ сынауда.

– Жабық кешендегі чемпионатта үздіктер анықталады. Жарыс қорытындысы бойынша іріктелген спортшылар сәуір айында Ташкент, Бішкек және Астана қалаларында өтетін әлемдік кезеңдерге қатысады. Биылғы басты мақсат – күзде өтетін Азия ойындарына жолдама алу. Маусым нәтижесіне қарай нақты шешім қабылданады, – деді ол.

Конкурдың басты ерекшелігі – қатысушылар жынысы мен жасына қарамастан, барлығы бірге жарысқа түседі.

Бүгінгі жарыс күнінің нәтижесі бойынша 120 см биіктіктегі кедергіден секіруде жеңімпаздар анықталды:

1-орын – Раиса Соколенко (Клюголд) – 1:02.72;
2-орын – Олег Соколенко (Кореандр вант лозерхоф Зет) – 1:02.94;
3-орын – Олег Соколенко (Кореандр вант лозерхоф Зет) – 1:04.72.

Жарыстың толық жеңімпаздары 29 наурыз күні белгілі болады.

Айта кетейік, өткен жылы Астана қаласы ұзақ үзілістен кейін конкур бойынша Еуразия лигасы әлем кубогының кезеңін қабылдаған еді.