Астанада түнде серуендеп жүрген есек полицияға түсті иесіне айыппұл салынды

Астана полицейлері қалада серуендеп жүрген есекті "ұстады". Оқиға куәгерлері ерекше операцияны видеоға түсіріп алған, деп хабарлайды Tengrinews.kz.

Астана полицейлері қалада серуендеп жүрген есекті "ұстады". Оқиға куәгерлері ерекше операцияны видеоға түсіріп алған, деп хабарлайды Tengrinews.kz.

Жалғыз жүрген есек 28 маусым күні кешкісін әуежай маңынан байқалған.

Куәгерлердің айтуынша, полицейлер жануарды аудан ішінде еркін жайылып жүрген жерінен көрген.

Астана Полиция департаменті редакцияның сауалына берген жауабында жануардың ұсталғанын хабарлады.

Есектің иесі табылып, Әкімшілік құқық бұзушылық туралы кодекстің (ӘҚБтК) 408-бабы – ауыл шаруашылығы жануарларын жаю қағидаларын бұзғаны үшін жауапқа тартылды.

"Есек қала маңындағы саяжай учаскесінің аумағынан өз бетінше шығып кеткені анықталды. Аталған дерек бойынша 42 жастағы иесі ауыл шаруашылығы жануарларын жаю қағидаларын бұзғаны үшін әкімшілік жауапкершілікке тартылды", - деп хабарлады Полиция департаменті.

Айта кетейік, ӘҚБтК-нің 408-бабында 3 АЕК (2026 жылы 12 975 теңге) көлемінде айыппұл қарастырылған. Қайталанған бұзушылық үшін айыппұл 10 АЕК-ке (43 250 теңге) дейін өседі.

Полиция ауыл шаруашылығы жануарларының иелеріне оларды күтіп-бағу және жаю ережелерін сақтау қажеттігін ескертеді. Бақылаусыз жайылым жол қозғалысы қауіпсіздігіне қатер төндіреді және жол-көлік оқиғаларына себеп болуы мүмкін. Полиция өкілдері иелері жануарлардың тұрақты орындарынан өз бетінше шығып кетпеуін қамтамасыз ететін қажетті шараларды қабылдауы тиіс екенін атап өтті.

Google News арқылы жаңалықтарымызды қадағалаңыз