Астанада туристік орталықтарға күніне 20 ға жуық адам жүгінеді

Қала әкімдігінің мәліметінше, «Заң мен тәртіп» қағидаты аясында туристік полиция мен «Astana Tourism» орталығы бірлесіп жұмыс істеуде. Туристерге арналған арнайы жадынамалар әзірленіп, олар Нұржол бульварындағы «Бәйтерек» монументінде және Қабанбай батыр даңғылындағы Нұрсұлтан Назарбаев халықаралық әуежайының халықаралық терминалындағы ақпараттық орталықтарда ұсынылады.

– Біз арнайы жадынамалар дайындадық. Оларды «Бәйтерек» монументіндегі және әуежайдағы туристік ақпараттық орталықтардан алуға болады. Ақпараттық орталықтарда келушілерге елорда туралы қажетті мәлімет беріліп, олардың бағыт-бағдар алуына көмектесеміз. Мамандар үш тілде қызмет көрсетеді. Әуежайдағы орталық тәулік бойы жұмыс істейді, ал «Бәйтерек» ішіндегі орталық күн сайын сағат 10:00-ден 21:00-ге дейін ашық. Қазір орталықтарға күніне шамамен 15–20 турист жүгінеді. Олар көбіне қаланың көрікті жерлері, бағыттар мен көлік қатынасы туралы сұрайды. Жаз мезгілінде туристер саны айтарлықтай артады, – деді «Astana Tourism» туризмді дамыту орталығы департаментінің директоры Базарбек Қамысбаев.

Сонымен қатар туристердің қауіпсіздігін туристік полиция қамтамасыз етеді. Астана қаласы Полиция департаментінің туристік полиция қызметі шетелдік және отандық қонақтарға бірнеше тілде көмек көрсетеді.

– Біз туристердің қауіпсіздігін қадағалаймыз. Қажет болған жағдайда тиісті қызметтерге хабарлаймыз. Жұмысымыз 12 сағаттық ауысыммен ұйымдастырылған, – деді полиция капитаны Құлпынай Тәңірберген.

Осылайша, елордада туристерге арналған ақпараттық қолдау мен қауіпсіздік жүйесі қатар дамып, қала қонақтарына қолайлы жағдай жасалып отыр.

Айта кетейік, Биыл Ертіс-Баян өңіріне келетін туристер саны күрт көбейеді.