Астанада тыйым салынған бекірелер сатылып жатыр ма? Әлеуметтік желідегі дау

Әлеуметтік желілерде Атырау тұрғыны Аслан Омаровтың бекіре тұқымдас балықтарды аулауға көп жылдан бері мораторий енгізілгеніне қарамастан, астанада Каспийден ауланған балықтың ашық сатылып жатқанын айтып наразылық білдірген видеосы тарады.

Оның сөзінше, теңіздің жағасында, Каспий өңірінде тұратын халық тек қарапайым балықпен шектелуге мәжбүр, ал бағалы Каспий бекіресі басқа аймақтарда еркін саудалануда. Ол бұрын бекірені заңсыз ұстағаны үшін жергілікті тұрғындар жиі айыппұл төлеп, мүлкінен айырылғанын еске салады. Қазір де заңсыз аулағаны үшін жауапкершілік бұрынғыдай қатаң. Алайда белсендінің пікірінше, мораторийді сақтау бойынша бақылау біржақты жүргізіліп, бұл саладағы ашықтық азайған.

Бұл жарияланымға жауап ретінде Жайық-Каспий облысаралық бассейндiк балық шаруашылығы инспекциясы Омаров таратқан ақпараттың шындыққа сәйкес келмейтінін мәлімдеді. Ведомствоның айтуынша, балық аулауға бақылау тұрақты түрде жүргізіледі, ихтиолог-мамандар кооперативтердің қабылдау пункттерінде күн сайын жұмыс істейді.

Инспекция бекіреге ғана емес, өзен-көлдердегі жай балық түрлеріне де бақылау жасалатынын атап өтті. Олардың дерегінше, соңғы бес жылда Атырау облысында балық аулау ережелерімен белгіленген кәсіптік мөлшерден кіші көлемде балық аулағаны үшін әкімшілік жауапкершілікке тартылған жағдай болмаған.

Инспекция бекіре балығының сатылуы тек арнайы шаруашылықтарда өсірілген немесе браконьерлерден тәркіленіп, заң бойынша өткізуге рұқсат етілген жағдайда ғана мүмкін екенін нақтылады. Ал жабайы табиғаттан бекірені аулауға тыйым салынған, бұл мораторий барлық Каспий маңы елдерінде ұзартылған. Егер бекіре балығы торға кездейсоқ түсіп қалса, оны дереу босату қажет.

Атыраулық балықшылардың көпшілігі бекіре кездейсоқ ауға түссе, оны Жайық өзеніндегі популяцияны сақтау үшін қайта босатып жіберетіндерін айтады.

Аслан Омаров өзінің мақсаты айыптау емес, жағдайдың ашықтығына назар аударту екенін айтты:

«Біз заң бұзуды талап етпейміз. Тек әділдік болсын дейміз. Халық Каспийдің балығы қайда кетіп жатқанын білуі керек», - дейді ол.

Ал балық инспекциясы белсендінің сөздері шындықты бұрмалап, жұртшылықты адастырады деп есептейді. Дегенмен олар ашық диалогқа дайын екенін және статистикалық деректермен бөлісуге әзір екенін мәлімдеді.

Формалды түрде екі тараптың айтуы дұрыс. Омаров әділеттілік пен ашықтықты талап етеді, инспекция заң талаптарын орындаймыз дейді. Бірақ олардың арасында Каспийдің өзі тұр — есептер мен ережелердің тасасында: «Біздің суларымызда өсетін байлықты шын мәнінде кім басқарып отыр?» деген қарапайым сұрақ қалып отыр.

Анастасия ШЕРСТЯНКИНА

Анықтама

Жайық-Каспий аймақаралық бассейндiк балық шаруашылығы инспекциясының дерегінше, 2020 жылдан 2025 жылға дейін Атырау облысында белгіленген өлшемнен кіші балық аулағаны үшін ешкім әкімшілік жауапкершілікке тартылмаған. 2024 жылы және 2025 жылдың тоғыз айында инспекция «Надежда-1», «Амангелді атындағы», «Тілекші» және «Абылайхан» кооперативтеріне қылмыстық және әкімшілік істер бойынша алынған 9 тонна 200 келі қара балық түрлерін сақтауға және сату үшін тапсырған. Заңға сәйкес, кәсіптік мөлшерге жетпеген балықтың торларға түсуіне жол берілетін шекті көлем — торларда 8 пайызға дейін, ал қақпан құралдарында 5 пайызға дейін болуы мүмкін.

Бүгін, 12:46