Астанада жауған жаңбыр 15 рейстің кешігуіне себеп болды

АСТАНА, 30 желтоқсан – Sputnik. Астанадағы Нұрсұлтан Назарбаев халықаралық әуежайында бір рейс тоқтатылып, 15-і кешіктіріліп отыр, деп хабарлады әуежайдың баспасөз қызметі.

"Әуежайда метеожағдай күрделі – жаңбыр жауып, мұз қатып жатыр. Әуежай мен барлық қызмет күшейтілген режимде жұмыс істеп, ұшу қауіпсіздігін қамтамасыз ету үшін барлық қажетті шараларды қабылдап жатыр", – делінген хабарламада.

Әуежай рейстердің кешігуіне қатысты нақты ақпарат берді:

Қону: 11 рейс

Ұшу: 4 рейс

"Кешігудің негізгі себебі – ауа райына байланысты ұшақтардың кеш келуі", – деп атап өтті баспасөз қызметі.

Сондай-ақ, Астанада қала маңына қатынайтын автобустар тоқтатылды. Күрделі метеожағдай салдарынан Астанадан шығатын барлық жол және кейбір өңірлік жолдар жабылған.