Астанадағы автосалон менеджері алдау арқылы 23 миллион теңгенің екі автокөлігін иемденіп алды

Астанада автосалондар бірінде сату менеджері болып жұмыс істеп, екі көлікті алдау жолымен иемденген ер адамға қатысты үкім шықты, деп хабарлайды Tengrinews.kz тілшісі 24.kz сілтеме жасап.

Сот анықтағандай, Changan CS55 Plus және Toyota Camry иелері көліктерін кейін сату үшін автосалонға өткізген. Менеджер оларға сатып алушылар табылды деген жалған ақпарат беріп, сатылған ақша бірнеше күннен кейін төленетінін уәде етіп, көліктерді үшінші тұлғаға қайта тіркеуге көндірген.

Құжаттар рәсімделгеннен кейін ер адам алынған қаражатты өз қалауы бойынша жұмсаған. Оның іс-әрекеті салдарынан автокөлік иелеріне 23 миллион теңге көлемінде материалдық шығын келтірілді.

Сот талқылауы барысында мемлекеттік айыптаушы сотталушының кінәсін дәлелдейтін айғақтарды ұсынды. Ер адам кінәсін толық мойындап, істеген ісіне өкінетінін білдірді. Сот оны кінәлі деп танып, 3 жыл 4 ай бас бостандығынан айыру жазасын тағайындады.

Жәбірленушілердің шығынды өтеу туралы азаматтық талап арызы қанағаттандырылды. Үкім заңды күшіне енді.

Прокуратура меншікке қарсы қылмыстар үшін мүлкі тәркіленіп, 7 жылға дейін бас бостандығынан айыру түріндегі қылмыстық жауапкершілік қарастырылғанын ескертеді және азаматтарды заң талаптарын қатаң сақтауға шақырады.

Google News арқылы жаңалықтарымызды қадағалаңыз