Астанадағы Бәйтерек маңындағы ерлер достығының көрінісі полицейлерге әсер етпеді

Астана полициясы түнгі уақытта пиротехника қолданғаны үшін жауапкершілік бар екенін ескертті. Елордада бір апта ішінде осындай үш жағдай тіркелді: заң бұзушыларға айыппұл салынып, бір ер адам бес тәулікке қамауға алынды, деп хабарлайды Tengri Life қалалық полиция департаментіне сілтеме жасап.

Алғашқы жағдай 22 шілдеге қараған түні болған. Түн ортасында тұрғын үйлердің бірінің ауласында бір топ адам отшашу ұйымдастырып, айқай-шу шығарған.

Полицейлер алтыға жуық қатысушыны анықтады. Оларға қатысты түнгі уақытта тыныштықты бұзғаны үшін әкімшілік хаттамалар толтырылды.

Пиротехниканы 30 жастағы әйелдің қолданғаны белгілі болды. Ол ұсақ бұзақылық жасағаны үшін әкімшілік жауапкершілікке тартылып, оған 20 айлық есептік көрсеткіш көлемінде айыппұл салынды.

Тағы бір жағдай 23 шілдеде "Бәйтерек" монументінің жанындағы алаңда болды. Полицейлер пиротехника атқан 37 жастағы ер адамды анықтады.

Ер адам бұл әрекетін досын көптен күткен сәбиінің дүниеге келуімен құттықтағысы келгенімен түсіндірді. Ол отшашуды алдын ала интернет-дүкеннен сатып алған.

Қоғамдық тәртіпті бұзғаны үшін ер адам бес тәулікке қамауға алынды.

Instagram-дағы бұл жарияланымды көру

Астана қаласының Полиция департаменті (@police__astana) жариялаған жазба

Үшінші жағдай 24 шілдеде Қошқарбаев даңғылында тіркелді. Полицияның мәліметінше, 24 жастағы жігіт досының келін түсіру қуанышына орай отшашу ұйымдастырған.

Оған қатысты әкімшілік материалдар толтырылып, сотқа жолданды.

Полиция елорда тұрғындары мен қонақтарын түнгі уақытта пиротехника қолданбауға шақырды. Ведомство мұндай әрекеттер қоғамдық тәртіп пен қала тұрғындарының тыныштығын бұзатынын, сондай-ақ қауіпсіздікке қатер төндіруі мүмкін екенін атап өтті.

Google News арқылы жаңалықтарымызды қадағалаңыз