Астанадағы концертті жасанды интеллект жүргізеді

АСТАНА, 6 шілде – Sputnik. Бүгін "Астана Арена" стадионында қала күніне арналған мерекелік концерт өтеді, деп хабарлайды Sputnik Қазақстан.

Концерт кезінде заманауи цифрлық технологиялар мен жасанды интеллект элементтері қолданылады. Мерекелік кештің жүргізушілері - Линара Есен мен Дарын Олжабай. Сонымен қатар көрермендерге жасанды интеллект технологияларының көмегімен жасалған цифрлық жүргізуші Батыржан Тазабеков таныстырылады.

Сахнада қазақстандық эстрада жұлдыздары - "Формат" тобы, Маржан Арапбаева, Raim, Ерке Есмахан, Әлішер Кәрімов, BAYANSULU, Alem, Bellucci, Yenlik, Abik Jeksen және Қайрат Нұртас өнер көрсетеді.

Мерекелік шараларға байланысты қосымша 60 автобус желіге шығарылады.

Сондай-ақ, "Қазақ елі" монументі алдындағы алаңда да ашық аспан астындағы концерт өтеді. Басталуы - сағат 18:00-де.