Астанадағы нөсерден кейін зардап шеккен автокөліктер үшін кім төлейді

Кеше Астанада найзағай ойнап, бұршақ аралас нөсер жауды. Жауын-шашын салдарынан жолдарды су басып, автокөліктер елорда көшелерінде қалқып жүрді. Бұл қауіпті әрекет қымбатқа түсетін ақау - гидросоққыға әкелуі мүмкін.

Нөсер жауыннан кейін біраз көлік зақымданды, ал желі қолданушылары: "мұндай шығынға жүргізуші ме, әлде нөсер кәрізі жұмысына жауапты қызмет жауап бере ме?" деген сұрақ қойып жатыр. Tengri Auto тілшісі бұл мәселені адвокат Абзал Қасымжановпен анықтап көрді.

Әлеуметтік желілерде жарияланған кадрлардан су басудан ең алдымен жеңіл автокөліктер зардап шеккені көрінеді. Жол саңылауының аздығынан олардың көбі радиатор торына дейін суға батқан, ал кейбір жағдайларда су деңгейі бүйір терезелердің төменгі жиегіне дейін жеткен.

Instagram-дағы бұл жарияланымды көру

Tengri Astana (@tengri.astana) жарияланымы

Естеріңізге сала кетейік, автокөлікпен су кедергілерінен өту қозғалтқыштың ауыр зақымдануына әкеп соғуы мүмкін. Ең қауіпті салдардың бірі гидросоққы, яғни қозғалтқыш цилиндрлеріне су кіріп, поршеньдер мен мотордың басқа да элементтері істен шығады.

Фото: © Tengrinews.kz / Нұрлан Алжабаев

Ал желіде су бұру жүйелері неге жұмыс істемейтінін және шығынды кім өтеуі керек екенін сұрап жатыр:

Адамдардың көлігіндегі ақауды кім қалпына келтіреді? Мемлекеттік бюджеттен жыл сайын ақша бөлінетін нөсер кәріздері қайда? Ал нөсер кәріздерінің неге жоқ екенін анықтамай ма? Су кететін жер неге жоқ? Мұны кім салған? Жауаптылар бар ма? Бұл үшін айыппұл салына ма? Адвокат пікірі

Адвокат Абзал Қасымжановтың айтуынша, егер автокөліктің зақымдануына расында нөсер кәрізі жүйесінің тиісінше жұмыс істемеуі себеп болса, онда ҚР заңнамасы көлік иелеріне келтірілген материалдық шығынды өтеуді талап етуге мүмкіндік береді.

"Дегенмен, нөсер жауын фактісінің өзі мемлекеттік органдардың немесе коммуналдық қызметтердің жауапкершілігін автоматты түрде білдірмейтінін түсіну қажет. Әрбір жағдайда инженерлік инфрақұрылымның тиісінше күтіп-ұсталмағанын немесе шығын тек төтенше ауа райы жағдайынан болғанын анықтау керек", - деп атап өтті ол.

Не істеу керек және нені білу қажет?

Заңгердің айтуынша, мұндай жағдайда оқиғаның барлық мән-жайын дұрыс тіркеп алу маңызды.

Оқиға орнын тіркеңіз

Оқиға орнын, су деңгейін, жолдағы жағдайды, нөсер ағыны күйін және көліктің зақымдануын фото мен видеоға түсіріп алыңыз.

Сондай-ақ геолокацияны, түсірілім уақытын сақтап, куәгерлер тапқан жөн.

Полиция шақырыңыз

Басқа көлікпен соқтығысу болмаса да, полиция қызметкерлері оқиғаны ресми түрде рәсімдей алады.

Бұл құжат сот талқылауы жағдайында негізгі дәлелдемелердің біріне айналуы мүмкін.

Көлікті бірден жөндемеңіз

Егер гидросоққы немесе басқа да ауыр зақымдану күдігі болса, көлікті техникалық қызмет көрсету орталығына эвакуатормен жеткізіп, диагностика жүргізген дұрыс.

Зақымданулар сипатталған және олардың туындау себебі көрсетілген акті алу маңызды.

Шығынның тәуелсіз бағалауын жүргізіңіз

Шығын көлемін тәуелсіз бағалаушы немесе сарапшы растауы тиіс.

Жөндеу құнынан бөлек, егер құжаттармен расталса, эвакуациялау, диагностика және басқа да шығындарды қосуға болады.

Жолдың бұл учаскесіне кім жауапты екенін анықтаңыз

Жолға және нөсер кәрізіне қызмет көрсететін ұйымды анықтау қажет.

Осы ұйым іс бойынша жауапкер болуы мүмкін.

Шағым жолдаңыз

Сотқа жүгінбес бұрын шығынды ерікті түрде өтеу туралы талаппен жазбаша шағым жолдап, барлық растаушы құжатты қоса беру ұсынылады.

Бас тартса - сотқа жүгініңіз

Абзал Қасымжановтың айтуынша, егер шығын ерікті түрде өтелмесе, көлік иесі талап арыз бере алады. Бұл ретте оған көліктің расында зақымдалғанын, бұл жауапкердің әрекетінен немесе әрекетсіздігінен болғанын дәлелдеу, сондай-ақ шығын көлемін растау қажет болады.

Адвокат мұндай дауларда ақауы бар нөсер жүйесі мен көліктің зақымдануы арасындағы себеп-салдарлық байланыстың маңызы зор екенін атап өтті.

Оның айтуынша, жауапкерлер көбінесе жауын-шашынның тым көп болғанын және су басудың алдын алу мүмкін емес екенін алға тартып, форс-мажорға сілтейді. Сондықтан көлік иесіне шығын себебі табиғи құбылыс қана емес, су бұру жүйесінің тиісінше күтіп-ұсталмауы немесе пайдаланылмауы екенін дәлелдеу маңызды.

Тағы оқыңыз: Көлікте неге көгерген иіс шығады: себептері, қаупі және зеңнен құтылу жолдары

Айыппұлды төлеуге асықпаңыз: адвокат оның күшін қашан жоюға болатынын айтты

Тек алкоголь емес: қандай дәрілер жолда жүргізушілерге қауіп тудыруы мүмкін?

Google News арқылы жаңалықтарымызды қадағалаңыз

Жазылу