Астанаға Израиль Сыртқы істер министрі келді

24.KZ парақшасындағы деректерге сәйкес, Qazaq24.com ақпарат таратты..

Израиль мемлекетінің сыртқы істер министрі Гидеон Саар Астанаға ресми сапармен келді.

Іс-сапар аясында екі ел арасында сауда-саттық қарым-қатынасын нығайту, ауыл шаруашылығы және су ресурстары саласындағы ықпалдастықты арттыру бойынша бірқатар келіссөз жүргізілді. Сондай-ақ қос мемлекеттің іскер топ өкілдерінің қатысуымен бизнес форум өткізіліп, бірлескен кәсіпорындарды құру мүмкіндіктері қарастырылды. Шара нәтижесінде, дипломаттарды даярлау, қоғамдық дипломатия және Қазақстан азаматтарын визалық талаптардан босату туралы ниеттестік меморандумдарға қол қойылды. Айта кеткен жөн, соңғы 20 жылда еліміздің экономикасына Израильден жарты миллиард долларға жуық тікелей инвестиция тартылған. Ал екі жақты тауар айналымы былтыр 162 миллион доллардан асып жығылды.

Ермек Көшербаев, ҚР Сыртқы істер министрі:

- Әріптесім Гидеон Саар мырзаның Қазақстанға сапары қазақ-израиль қарым-қатынасын нығайтуға екі елдің де бейіл екенін растайды. Қазақстан өзінің сыртқы саясатында бейбітшілікке, диалогқа және прагматикалық ұстанымға басымдық береді. Қазақстан Таяу Шығыстағы жағдайға алаңдаушылықпен қарайды және аймақта тұрақтылық пен қауіпсіздікті қамтамасыз етуге бағытталған сындарлы күш жігерді қолдайды.

Гидеон Саар, Израиль Сыртқы істер министрі:

- Қазақстан Израиль үшін адал дос және маңызды серіктес. Қос мемлекет арасында тарихи және демократиялық құндылықтарға негізделген берік байланыс қалыптасқан. Бүгінгі сапарым – осы қарым-қатынасты одан әрі нығайтуға бағытталған.

Соңғы жаңалықтар мен жаңартуларды жіберіп алмау үшін Qazaq24.com сайтынан бақылауды жалғастырыңыз, біз жағдайды қадағалап, ең өзекті ақпаратты ұсынамыз.