Астананың бас санитары халыққа үндеу жолдады

АСТАНА, 22 қаңтар – Sputnik. Астана қаласының бас санитариялық дәрігері Айгүл Шағалтаева қызылша ауруының таралуына байланысты халыққа үндеу жолдады, деп хабарлайды Sputnik Қазақстан тілшісі.

Елордада қызылша ауруына шалдыққандардың саны өсіп келеді. Көбісі – балалар. 234 науқастың 218-і (93,2%) 14 жасқа дейінгі бала. Олардың басым бөлігі вакцина алмаған.

"Қызылша балалардың жай ғана жеңіл ауруы емес. Бұл - ең жұқпалы вирустық аурулардың бірі. Мәселен, науқаспен байланыста болған кезде қорғалмаған адамдардың 90-95% жұқтырады", - дейді Шағалтаева.

Вирус ауа арқылы таралып қана қоймай, жөтелу, түшкіру, тіпті адаммен сөйлескенде тез таралады. Ал Дүниежүзілік денсаулық сақтау ұйымының ақпаратына сәйкес, қызылшадан тек вакцинамен қорғануға болады. Қызылшаның таралуын тоқтату үшін халықтың кем дегенде 95%-ы вакцинация алуы керек.

"Вакцинация алмаған немесе вакцинация мәртебесі белгісіз науқастармен байланысқан адамдар үшін 72 сағат ішінде шұғыл иммундау жүргізіледі. Бұл аурудың дамуын болдырмайтын және вирустың одан әрі таралуын тоқтататын тиімді шара", -деп атап өтті бас санитариялық дәрігер.