​ Атырау облысы Кәсіпкерлер палатасының директоры тағайындалды

30 шілде 2026 жылы «Атамекен» Ұлттық кәсіпкерлер палатасы Басқармасының шешімімен және Өңірлік кеңестің келісімі бойынша Нұржан Мақсотұлы Ермұханов Атырау облысы Кәсіпкерлер палатасының директоры болып тағайындалды.

Жаңа басшыны ұжымға ҰКП Басқарма төрағасының орынбасары Мұратбек Маханов таныстырды. Ол Ермұхановтың мол тәжірибесі өңірлік палатаның жұмысын күшейтіп, кәсіпкерлердің құқықтары мен мүдделерін қорғауда тиімділікті арттыратынына сенім білдірді.

Нұржан Ермұханов бұған дейін Атырау қаласы әкімінің орынбасары және әкім міндетін атқарушы қызметтерін атқарып, шағын және орта бизнесті дамытуға, инвестициялық жобаларды қолдауға ерекше көңіл бөлген. Оның кандидатурасын Өңірлік кеңес мүшелері бірауыздан қолдап, жаңа директорға табысты жұмыс тіледі.

Ермұханов 1976 жылы Атырауда дүниеге келген. Филология, экономика және менеджмент салаларында бірнеше жоғары білім алған, мұнай-газ ісі бойынша магистр дәрежесі бар. Еңбек жолын 1994 жылы мұғалім болып бастап, кейін кәсіпкерлік пен мемлекеттік басқару саласында қызмет атқарды. Әр жылдары әкімдік пен «ҚазМұнайГаз» компаниясында, спорт басқармасында және мәслихатта жұмыс істеді. Соңғы қызметінде Атырау облысы Ішкі саясат басқармасының Қоғамдық пікірді зерттеу орталығын басқарды.

Жаңа лауазымында ол бизнес қауымдастығымен тығыз ынтымақтастық орнатып, өңірлік кәсіпкерлікті дамытуға күш салатынын атап өтті.

Бүгін, 20:58