Атырау облысының құрылыс басқармасына жаңа бөлім басшысы тағайындалды

Атырау облысының құрылыс, сәулет және қала құрылысы басқармасында жоспарлау-экономикалық бөлімінің жаңа басшысы тағайындалды. Бұл қызметке Ернар Қадырбай келді.

Ернар Қадырбайдың мемлекеттік қызметте мол тәжірибесі бар. Еңбек жолын 2019 жылы Атырау облыстық жастар саясаты мәселелері басқармасында әдіскер болып бастаған. Кейін жастар мен әлеуметтік бастамаларды қолдау бағытында, сондай-ақ сол басқарманың қаржы, құқық және ұйымдастыру бөлімдерінде бас маман қызметін атқарған.

2021 жылы ол Атырау облысы ішкі саясат басқармасына ауысып, ақпараттық-талдау және этносаралық қатынастар мәселелерімен айналысты.

2023 жылдан бастап облыстық құрылыс басқармасының құрылыс бөлімінде бас маман болып жұмыс істеді.

Енді ол құрылыс, сәулет және қала құрылысы басқармасының жоспарлау-экономикалық бөлімінің басшысы ретінде қызметін жалғастырады.

Еске салайық, қыркүйек айында облыстық ҰҚК департаментінің қызметкерлері Атырау облысының құрылыс, сәулет және қала құрылысы басқарма басшысының 33 жастағы орынбасары Талғат Бисенді Құрманғазы ауданынан іссапардан оралған сәтінде ұстаған еді.

Ал 30-ынан 31 қазанға қараған түнде Құрманғазы ауданында жер қатынастары, сәулет және қала құрылысы бөлімі басшысы өзіне қол жұмсаған болатын.

Бүгін, 10:57