Атырау шенеуніктері жаңа стадион құрылысының құнын жарияламай отыр

Құрылыс алаңында жұмыстар жүріп жатыр, ал облыс әкімдігі бұл жобаға бюджеттен бір тиын да бөлінбегенін мәлімдеді.

UEFA стандартына сай жаңа спорт аренасының көптен күткен құрылысы өткен айда басталды. Жағымды жаңалықты тарата отырып, әкімдік әдеттегіше, баспасөз хабарламасында қаржы көлемі мен оның көздері туралы ешқандай мәлімет бермеді. Бұл таңқаларлық емес: тәжірибе көрсеткендей, кейбір шенеуніктер бюджет қаржысын жеке қор ретінде қабылдайды, сондықтан салық төлеушілердің ақшасының қалай жұмсалатынын білу міндетті емес деп санайды.

„АЖ“ редакциясының сауалына жауап берген облыстық құрылыс, сәулет және қала құрылысы басқармасы (жұмыстың тапсырыс берушісі) да жобалық-сметалық құжаттамада нақты белгіленсе де жобаның құны туралы сұрақты елемеді.

«Қаржыландыру көзіне қатысты: қазіргі уақытта аталған нысанның құрылысына жергілікті бюджеттен қаражат бөлу үшін тиісті өтінімдер жолданды. Қаражаттың нақты көздері мен бөлінетін көлемі заңнамаға сәйкес бюджет комиссиясының шешімімен айқындалатын болады», – делінген ведомствоның хатында. Бұл жауап жағдайды одан әрі түсініксіз етті, себебі қазіргі жұмыстардың қай қаржы есебінен жүргізіліп жатқаны белгісіз. Тек бейресми деректерге сүйенсек, Атыраудағы жаңа стадион құрылысының құны миллиардтаған теңгемен есептеледі.

Жобаны жүзеге асыру бойынша бас мердігер – «Aspan Holding» ЖШС. Ашық деректерге сәйкес, компания 2010 жылы Ақтөбеде тіркелген, соңғы жылдардағы басшысы - Алмас Махатов. 

2025 жылы «Aspan Holding» Оралдағы ТМ-2 жылу магистралін, сондай-ақ Астанадағы Ақорда, Парламент және Үкімет ғимараттары арасындағы үкіметтік кварталды реконструкциялау жұмыстарымен айналысқан.

Қазіргі уақытта компания „Қызылорда Арена“ спорт кешенінің бас мердігері. Ал былтыр күзден бері Атырауда 1200 орындық концерт залын және облыстық тарихи-өлкетану музейін салып жатыр.

Лев ГУЗИКОВ

Бүгін, 21:43