Атырау тұрғындарына ауа сапасының нашарлауы мүмкін екені ескертілді

1 қарашада Қазақстанның 11 қаласында атмосфералық ауаның ластануына ықпал ететін қолайсыз метеорологиялық жағдайлар (ҚМЖ) болжануда. Бұл тізімге Атырау қаласы да енді. Мұнда ескерту түнгі уақытта күшіне енеді. Бұл туралы «Қазгидромет» РМК хабарлады.

Синоптиктердің мәліметінше, 1 қарашада тоғыз қалада қолайсыз метеорологиялық жағдайлар күтіледі:

Қарағанды;

Жезқазған;

Балқаш;

Теміртау;

Орал;

Ақтөбе;

Шымкент;

Алматы;

Түркістан.

Сонымен қатар, түнгі уақытта Атырау мен Астана қалаларында да ҚМЖ болжанып отыр.

Қолайсыз метеорологиялық жағдайлар желсіздік, әлсіз жел, тұман және температуралық инверсия сияқты ауа райы факторларының үйлесуі нәтижесінде қалыптасады.

Қалыпты жағдайда жел ластаушы заттардың таралуына ықпал етеді. Алайда ауа қозғалысы баяулаған кезде көлік құралдарынан, өнеркәсіптік кәсіпорындардан және басқа да көздерден шығатын зиянды қалдықтар атмосфераның жерге жақын қабатында жиналуы мүмкін.

Соның салдарынан зиянды заттардың концентрациясы артып, тұрғындардың денсаулығына қосымша қауіп төндіруі ықтимал.

Айта кетейік, ҚМЖ болжамы ластаушы заттардың рұқсат етілген шекті мөлшерден асуы тіркелді дегенді білдірмейді. Бұл — ауа сапасының нашарлау қаупі жоғарылайтын метеорологиялық жағдайлар туралы ескерту.

Қолайсыз метеорологиялық жағдайлар кезінде мамандар мүмкіндігінше ашық ауада болу уақытын қысқартуға, әсіресе көлік қозғалысы қарқынды жолдар мен өнеркәсіптік нысандар маңында ұзақ жүрмеуге кеңес береді.

Балалар мен жүкті әйелдерге ұзақ уақыт серуендеуден бас тарту ұсынылады.

Тыныс алу және жүрек-қан тамырлары жүйесінің созылмалы аурулары, сондай-ақ аллергиялық аурулары бар адамдарға қажетті дәрі-дәрмектерін өздерімен бірге алып жүру ұсынылады.

Сондай-ақ далада қарқынды дене жаттығуларын шектеп, мүмкіндігінше жаттығуларды жабық ғимараттарда өткізген жөн.

1 қараша, 12:58