Атырау тұрғындарына түнде ауа ластануы мүмкін екені ескертілді

Алматы, Астана және Ақтөбе қалаларында 8 тамызда қолайсыз метеорологиялық жағдай болады деп күтілуде.  Атырауда мұндай болжам түнгі уақытқа қатысты, деп хабарлады «Қазгидромет».

Қолайсыз метеорологиялық жағдай дегеніміз – желсіздік, әлсіз жел, тұман немесе температуралық инверсияның қатар келуі. Бұл факторлар ауадағы зиянды заттардың таралуына кедергі жасап, олардың жерге жақын қабатта жиналуына әкелуі мүмкін.

Төрт қала тұрғындарына көшеде болу уақытын азайту ұсынылады, әсіресе көлік көп жүретін жолдар мен басқа да ластану көздерінің маңында. Балалар мен жүкті әйелдерге ұзақ серуеннен бас тарту кеңес етіледі.

Өкпе, жүрек-қан тамыр аурулары және аллергиясы бар адамдар қажетті дәрілерін өзімен бірге ұстауы тиіс. Ашық ауада дене жаттығуларын шектеу, ал спортпен айналысуды жабық орындарға ауыстыру ұсынылады.

Айта кету керек, қолайсыз метеорологиялық жағдайдың болжамы ауада зиянды заттардың жиналу қаупін көрсетеді, бірақ бұл міндетті түрде ауа сапасының рұқсат етілген деңгейден асып кететінін білдірмейді.

Бүгін, 15:00