Атырауда 260 борышкер мүлде алимент төлемеген

Қазір облыста 74 жеке сот орындаушы қызмет атқарады. Оларда алимент өндіру бойынша 10 мыңнан астам атқару құжаты бар. Соның ішінде 5 мың іс бойынша алимент төлемдері борышкерлердің жұмыс орнынан тұрақты түрде ұсталып отыр. Сонымен қатар 2 мыңға жуық азамат алиментті ішінара, ерікті түрде төлеуде. Мүлдем төлемейтін борышкерлердің саны – 260. Облыста алиментті тұрақты төлейтін 28 әйел бар.

– Елімізде орташа жалақы көлемі – 429 368 теңге. Борышкер жұмыссыз қалған жағдайда алимент орташа жалақы мөлшерінен пайызбен есептеліп ұсталады, сондықтан берешектің көлемі арта береді. Осыған байланысты жұмыссыз қалған азаматтар сот орындаушысын дер кезінде хабардар етіп, жұмыссыздық мәртебесін рәсімдеп, тиісті анықтамасын ұсынуы қажет, - деді облыстық Әділет департаментінің бөлім басшысы Ақбөбек Дүсіпқалиева.

Қолданыстағы заңнама бойынша бір балаға табыстың 25 пайызы, екі балаға 33 пайызы, үш және одан көп балаға 50 пайызы ұсталады.

Еске салсақ, борышкерлерді жұмыспен қамту мақсатында өткен жылы Жұмыспен қамту орталықтарымен бірлескен бос жұмыс орындары жәрмеңкесі 6 мәрте ұйымдастырылды. Онда жұмысқа орналасқан 617 борышкердің 542-сі алимент берешегі бар азаматтар болғаны анықталды.

Бұған дейін Оралда алимент төлемегендер сотқа тартылып, 416 баланың құқығы қорғалғанын жазып едік.