Атырауда Fly Arystan рейсінен түсірілген жолаушыға айыппұл салынды

2 мамыр 2025 жылы Атырау әуежайында «Атырау – Шымкент» бағытына ұшаққа отырғызу кезінде жолаушы Айжан Кеңесова мен авиакомпания қызметкерлері арасында жанжал шықты. Себеп – қол жүгінің белгіленген өлшемдерге сәйкес келмеуі.

Fly Arystan дерегінше, әйелге жүгін багаж ретінде рәсімдеу ұсынылған, алайда жағдай эмоциялық қақтығысқа ұласты. Агрессивті әрекеттеріне байланысты оны рейске отырғызудан бас тартып, желілік полиция бөлімінің қызметкерлеріне тапсырды.

«Ақ Жайыққа» белгілі болғандай, істі қараған Атырау әкімшілік құқық бұзушылықтар жөніндегі мамандандырылған соты Кеңесованы ҚР ӘҚБтК-нің 434-1-бабы («Қорлау») бойынша кінәлі деп таныды. Сот оның әуежай қызметкерлеріне балағат сөздер айтқанын және агрессивті мінез-құлық көрсеткенін анықтап, 55 048 теңге көлемінде айыппұл салды.

Бұған дейін Кеңесова әлеуметтік желілерде және БАҚ-та өзін рейстен негізсіз түсіргенін, қорлағанын және заңсыз полицияға тапсырғанын мәлімдеген. Оқиғаға қатысты бейнежазба интернетте кең таралып, миллиондаған қаралым жинады.

Fly Arystan қол жүгін тексеру тіркеу кезінде де, ұшаққа отырғызу алдында да жүргізілетінін, ал өлшемнен асқан жағдайда багажға өткізу міндетті екенін түсіндірді.

Сот қаулысы заңды күшіне енді.

Анастасия ШЕРСТЯНКИНА

Бүгін, 22:17