Атырауда газ сепарациялау кешенінің құрылысы басталды

19 қараша күні Теңіз кен орнында Газ сепарациялау кешенінің (ГСК) алғашқы қадасы қағылды. Жылына 9,1 миллиард текше метр құрғақ газ өңдеуге арналған бұл өндірістік нысан — Қазақстанның мұнай-газ химиясы саласындағы ірі жобалардың бірі саналады.

Кешен құрылысы аясында 22 мыңға жуық қада қағу жоспарланған. Барлық құрылыс материалдары мен жабдықтар қазақстандық өндірушілерден сатып алынуда. Жобаны іске асыру барысында отандық кәсіпорындар мен сервистік компаниялар кеңінен тартылып, жергілікті мамандардың қатысуына басымдық беріледі.

Кешеннің басты мақсаты — полиэтилен өндіретін «Силлено» зауытын жылына 1,6 миллион тонна этанмен қамтамасыз ету. Сонымен қатар, жылына 360 мың тоннаға дейін пропан өндірілмек. Бұл өнімдер «Теңізшевройл» компаниясы жеткізетін құрғақ газдан бөлініп алынады.

Нысанда сұйытылған көмірсутек газдарын өңдеу және фракциялау саласындағы жетекші Honeywell UOP компаниясының технологиялары қолданылады. Жобаны «ҚазМұнайГаз» ұлттық компаниясының еншілес ұйымы — «KMG PetroChem» ЖШС жүзеге асыруда. Құрылыс жұмыстары халықаралық консорциуммен бірлесіп жүргізілуде. Оған Италияның Tecnimont S.p.A. (Maire тобы) және Ливанның CCIC компаниясы кіреді.

Құрылыс барысында 1 миллион 193 мың текше метр инертті материал, 27 мың тоннадан астам металл конструкциялар, 7 модульдік қосалқы станция, 62 трансформатор, 220 кВ ашық тарату құрылғысы, сондай-ақ пропан сақтауға арналған көлденең буллиттер мен төрт ірі колонна пайдаланылмақ.

Жоба өңірлік жұмыспен қамтуға да оң ықпал етеді. Құрылыс кезеңінің ең белсенді сәтінде Атырау және Маңғыстау облыстарының тұрғындары үшін 3 500-ге дейін уақытша жұмыс орны ашылады. Ал кешен іске қосылғаннан кейін 400 тұрақты жұмыс орны құрылмақ.

Газ сепарациялау кешенінің іске қосылуы тұрақты шикізат базасын қалыптастырып, жоғары қосылған құны бар өнім өндіруге жол ашады. Бұл Мемлекет басшысы айқындаған мұнай-газ химиясы кластерін дамыту және шикізаттық емес экспортты арттыру жөніндегі стратегиялық мақсаттарға толық сәйкес келеді.

Кешенді іске қосу 2028 жылдың соңына, ал толық пайдалануға беру 2029 жылға жоспарланған.

Бүгін, 16:58