Атырауда Infinity сауда орталығы артындағы жер телімі құрылыс компаниясының меншігіне өтіп кеткен

Сөз болып отырған жер — Сәтпаев көшесі, 39А мекенжайындағы көпқабатты үйге кіреберіс жолдың үстінен өтетін сауда кешенінің жабық өткелі-галереясы орналасқан аумақ.

Бұл жер телімінің тарихы 2023 жылы басталды. Сол кезде «Сұңқар Девелопмент» ЖШС қала әкімдігіне өтініш білдіріп, өзінің негізгі учаскесіне жерүсті жаяу жүргіншілер өтпесін салу және көлік жүретін жол төсеу үшін көлемі 0,1645 га қосымша жер беруді сұраған. Ол 2022 жылы сауда-ойын-сауық орталығының ғимараттарына қызмет көрсету үшін 0,7610 га құраған.

2023 жылғы 20 қазанда қала әкімі Шәкір Кейкиннің қаулысымен бұл қосымша учаске үш жыл мерзімге уақытша ақылы жер пайдалану құқығымен берілді. Құжатта арнайы шектеулер көрсетілді: учаскені бөлуге болмайды, қоршау орнатуға тыйым салынады және күрделі құрылыс жұмыстарын жүргізуге жол берілмейді.

Алайда, 2023 жылғы 8 желтоқсанда Мемлекеттік сәулет-құрылыс бақылауы (МСҚБ) басқармасы маңайдағы үй тұрғындарының арызы бойынша жоспардан тыс тексеріс жүргізді. Сол кезде құрылыс жұмыстарының рұқсат құжаттарсыз-ақ басталып кеткені анықталды.

Жұмыстар тоқтатылды, құрылыс компаниясына айыппұл салынды және құжаттаманы белгіленген тәртіппен рәсімдеу туралы нұсқама берілді.

Бүгінде бұл учаскеде тыйым салынғанына қарамастан, «Infinity» кешеніне біріктірілген күрделі нысан орналасқан. Галерея-өтпе сауда орталығының ғимараттарын қосып тұр, оның ішінде дүкендер мен коммерциялық орындар жұмыс істеп жатыр.

Сауда орталығының галереясы: құжаттарда бұл жай ғана өткел ретінде көрсетілген, ал іс жүзінде — жұмыс істеп тұрған сауда аймағы

Осы құрылымның астымен №39А тұрғын үйіне баратын жол өтеді, оны тұрғындар күнделікті пайдаланады. Қазіргі уақытта қозғалысқа шектеу қойылмағанымен, сол жерде шлагбаум орнатуға арналған металл тұғыр қойылған.

№39А үйге кіретін жалғыз жолда шлагбаум орнату үшін дайындық жұмыстары жүргізілуде.

2025 жылғы 24 шілдеде қала басшысының қаулысымен көлемі 0,1645 га учаске жеке меншікке берілді. Жерді беру құны 6 миллион 264 мың 160 теңгені құрады. Бұл жердің әр шаршы метріне шаққанда шамамен 3 800 теңгеден келеді.

Бірақ мәселе тек бағада емес.

Жер кодексі, егер жер телімі жеке меншіктегі нысанға қызмет көрсету үшін қажет болса, оны жеке меншікке беруге шынымен де рұқсат етеді. «Infinity» сауда орталығы бұрыннан жеке меншікте. Галерея оның ғимаратына біріктірілген және коммерциялық мақсатта пайдаланылуда, ішінде бутиктер мен орынжайлар жұмыс істеп тұр. Осы тұрғыдан алғанда, оның астындағы жерді сауда нысанына қызмет көрсететін учаске ретінде қарастыруға болады.

Алайда негізгі мәселе басқада. Галерея мен өткел астындағы жер тек 2025 жылдың жазында ғана жеке меншікке өткен. Оған дейін ол жер үш жыл мерзімге уақытша пайдалануда болды және ол кезде күрделі құрылыс салуға немесе қоршау орнатуға тікелей тыйым салынған еді.

Сонымен қатар, галереяның астымен Сәтпаев, 39А мекенжайындағы тұрғын үйге және оған жапсарлас үйлерге баратын жалғыз жол өтеді. Яғни, бұл жерде әңгіме тек «сауда орталығының астындағы» жер туралы емес, тұрғындар пайдаланатын жол туралы болып отыр.

Осы жерде: «бұл сауда кешені аумағының бір бөлігі ме, әлде қала инфрақұрылымының элементі ме?» деген негізгі сұрақ туындайды.

№39А үйге жалғыз кіреберіс — өткел астындағы жол. Үйге баламалы кіреберіс жоқ.

Редакция тиісті ведомстволарға учаскенің құқықтық мәртебесін түсіндіруді және бұл жолдың ортақ пайдаланылатын жерлерге жататынын анықтауды сұрап сауал жолдады. Алынған жауаптарда учаскенің меншікке берілгені және сәулет-жоспарлау тапсырмасының берілгені расталды, бірақ жолдың құқықтық мәртебесіне баға берілмеді.

Үй тұрғындары Бас прокуратураға өтініш жолдады. Олардың айтуынша, осы жолмен күнделікті қатынайды және өз аулаларына кіретін жалғыз жолдың қалайша жеке меншікке өтіп кеткенін түсінбей отыр. Тұрғындар болашақта шектеулер пайда болуы мүмкін деп қауіптенеді.

Нақты жағдайды ешкім жоққа шығармайды: учаске алдымен уақытша пайдалануға беріліп, кейін жеке меншікке ресімделген. Ендігі негізгі сұрақ — бұл жер заңнамасының талаптарына сәйкес келе ме және іс жүзінде ортақ пайдаланудағы жер ретінде қолданылып жүрген аумақ емес пе?

Редакция оқиғаның дамуын бақылауды жалғастырады.

Анастасия ШЕРСТЯНКИНА

Суреттерді түсірген автор

Бүгін, 12:11