Атырауда Қиғаш өзенінің деңгейі 1 метрге жуық көтерілген

2026 жылдың 28 сәуірдегі ақпарат бойынша, Қиғаш өзенінің Бөкейхан ауылы тұсындағы су деңгейі 215 сантиметрді құрап, тәулігіне 9 сантиметрге артқан. Қауіпті деңгей — 518 сантиметр. Шортанбай ауылы маңында су деңгейі 367 сантиметрге жетіп, 7 сантиметрге көтерілген. Бұл тұста қауіпті шек — 555 см.

Қиғаш өзені Каспий теңізінен шамамен 75 шақырым қашықтықта орналасқан. Өзеннің ені 80-100 метр аралығында, ал ең терең тұсы 4,6 метрге дейін жетеді.

Шарон өзеніндегі жағдай да тұрақты. Құрманғазы ауылы тұсындағы су деңгейі 211 сантиметрді құрап, бір тәулікте 5 сантиметрге көтерілген. Қауіпті деңгей — 422 сантиметр. Өзен елді мекендер аумағы арқылы 98 шақырымға созылып, Құрманғазы ауылынан оңтүстікке қарай шамамен 35 шақырым жерде Каспий теңізіне құяды. Оның ені 35-50 метр, орташа тереңдігі 3,16 метр.

— Негізгі көктемгі су тасқыны орташа есеппен 47 күнге созылады. Осы жылдың 1 қаңтарынан бастап Қиғаш өзеніндегі су деңгейі 5,85 метрден 6,72 метрге дейін, яғни 0,87 метрге көтерілді. Бүгінгі таңда Дыңғызыл ауылында жалпы ұзындығы 3813 метр, Шортанбай ауылында 1 585 метр, Көптоғай ауылында 3747 метр бөгет көтеру жұмыстары жүргізілді. Республикалық, облыстық және аудандық маңызы бар автожолдарда су шайып кетуі мүмкін қауіпті учаскелер анықталмады, — деп мәлімдеді Құрманғазы аудандық әкімдігі.

Жалпы Қиғаш өзеніндегі су тасқыны режимі Волгоград су қоймасынан келетін су көлеміне байланысты қалыптасады. Ресейлік гидрологиялық қызметтердің мәліметінше, 11 сәуірден бастап Волжск ГЭС-і Еділдің төменгі ағысына су жіберуді кезең кезеңімен арттырған. 24 сәуірде су жіберу көлемі секундына 26 мың текше метрге жеткен. Қазіргі уақытта су жіберу көлемі біртіндеп азайып жатыр: 27 сәуір мен 1 мамыр аралығында — 24 мың текше метр. Ал 6 мамырға қарай шамамен 19 мың текше метрге дейін төмендеуі күтіледі.

Мамандар су жіберу көлемі гидрометеорологиялық жағдайға байланысты өзгеруі мүмкін екенін айтады.

Айта кетейік, Құрманғазы ауданында тасқынға 128 техника әзірленген. Оның құрамында өрт сөндіру көліктері, тракторлар, автобустар, жүк көліктері, экскаваторлар мен қайықтар бар.

Бұған дейін Қиғаш өзенінің арналарын тереңдету жұмысы жүріп жатқаны жөнінде жазған едік.