Атырауда қоқыс полигоны аумағындағы өрт сөндіріліп жатыр

Атырауда төтенше жағдайлар қызметі қоқыс полигоны аумағындағы түтінді жою жұмыстарын жүргізуде. Өрт ошағы Солтүстік өнеркәсіптік аймақ аумағында тіркелген.

Бықсыған түтін туралы хабарлама бүгін, 7 сәуір сағат 08:30-да түсті. Оқиға орнына дереу қалалық құтқарушылар мен коммуналдық қызмет күштері жұмылдырылды.

Жұмыс ауқымы үлкен ресурстарды қажет етеді. Қазіргі уақытта полигонда:

Атырау облыстық ТЖД: жеке құрамның 11 адамы және 2 бірлік арнайы техника;

«АрнаулыАвтоБаза» ЖШС: 31 қызметкер және 31 бірлік техника (самосвал, тиегіш және су тасушы көліктер).

Қазіргі уақытта өрт сөндірушілер мен коммуналдық сала мамандары өрт ошағын оқшаулау және сөндіру жұмыстарын жүргізіп жатыр. Көбіне астынан бықсып жанған қоқыс жағдайды күрделендіріп отыр.

«Түтінді жою бойынша белсенді жұмыстар жүргізіліп жатыр. Қазіргі уақытта өрттің нақты аумағы анықталып жатыр», — деп хабарлады ведомствоның баспасөз қызметі.

Өрттің шығу себебі туралы ақпарат кейін беріледі.

Бүгін, 10:27