Атырауда субұрқақтарды күтіп ұстауға 320 млн теңгеден астам қаржы бөлінеді

Бұл өткен жылға қарағанда шамамен 100 млн теңгеге көп.

Мемлекеттік сатып алу порталының деректеріне сәйкес, мердігер болып Ibrohim ЖК таңдалды. Компания екі лотты бірдей бағамен — әрқайсысы ҚҚС-мен 161 миллион 240 мың теңгеге жеңіп алды. Шарттар 4 ақпанда жасалып, жылдың соңына дейін күшінде болады. Жалпы сома 322 миллион 480 мың теңгені құрайды.

Қаржыландыру «Елді мекендерді абаттандыру және көгалдандыру» бюджет бағдарламасы бойынша қарастырылған.

Салыстыру үшін: 2025 жылы осыған ұқсас қызметтерге 229 миллион теңге бөлінген. Ол кезде де екі лот өткізілген, жеңімпаз — Ақтөбеде тіркелген GlobalStroy KZ ЖК болған.

Компанияның басшысы әрі құрылтайшысы Самир Кушимов бір мезгілде «АСУ Групп» ӨК және «Ақтөбе ЭлектроМонтаж» ЖШС-ін басқарады.

Қала әкімдігінің деректеріне сәйкес, Атырауда шамамен 40 субұрқақ бар, олар 14 локацияда орналасқан. Барлығы декоративті, онда шомылуға және қол жууға тыйым салынған. Субұрқақ астынан жоғары кернеулі инженерлік желілер өтеді.

Қызығы, Ibrohim ЖК басшысы Самир Кушимовпен фамилиялас Дамир Кушимов. Ол компанияны 2019 жылғы 7 маусымда Ақтөбеде тіркеген. Кейбір дереккөздерде қызметтің басталу күні 2025 жылғы 31 шілде деп көрсетілген.

ЖК-ның негізгі қызмет түрі — базарларда тауарларды бөлшек саудада сату және жеке қызметтер көрсету. Соған қарамастан, компания абаттандыру жұмыстарын тұрақты атқарып келеді.

Дамир Кушимов сондай-ақ «АктобеГорЭнергоСервис» ЖШС-ін басқарады. 2025 жылы компания 73 миллион теңгеге бүлінген плиталарды ауыстыру, ескерткіштер айналасына мәрмәр жабынды төсеу және жарықтандыру жүйесін жаңғырту жұмыстарын жүргізген. Бұл компанияның негізгі бағыты — кең ассортиментті тауарларды көтерме саудада сату.

Алайда екі компания да қаланы абаттандыру жұмыстарымен айналысады.

Ibrohim ЖК бұған дейін де Атырауда тапсырыс алған. 2024 жылы компания БСН 901220350549 бойынша субұрқақтарды күтіп-ұстауға 133 миллион 800 мың теңгеге тендер жеңіп алған. 2025 жылы ол тутұғырды күтіп-ұстауға 8 миллион 774 мың теңгеге ҚҚС-пен келісімшарт жасасты. Екі келісім де бір көзден тікелей жасалған.

Айта кету керек, 2022 жылы атауы ұқсас, бірақ басқа БСН-мен — 900218300434 — ЖК тутұғырды күтіп-ұстауға 4 миллион 440 мың теңгеге тендер жеңіп алған.

Сонымен қатар, 2024 жылы ЖК ашық конкурс арқылы Жаңаталап ауылында жасыл желектерді қоршау жұмыстарын ҚҚС-пен 32 миллион 482 мың теңгеге  орындаған.

Айнұр САПАРОВА

Бүгін, 11:55