Атырауда тарихи үйлердің орны бос тұр: жаңа құрылыс әзірге жоспарланбаған

Жилгородоктағы кейбір үйлер реновация бағдарламасы аясында сүріліп жатқаны белгілі. Жақында жұрт «паровозик» деп атап кеткен, ұзақ уақыт қаңырап бос қалған екі үй толықтай сүрілді.

Естеріңізге сала кетейік, Жилгородок ықшамауданы бастапқы тарихи келбетін жоғалтқандықтан республикалық маңызы бар сәулет және қала құрылысы ескерткіші мәртебесінен он жылдай бұрын айырылған еді. Дәлірек айтқанда, бұл жағдайға жергілікті биліктің өзі жеткізді деуге болады. Қазіргі таңда жоғары мәртебесі сақталған тек алты нысан ғана қалды, соның ішінде Құрманғазы атындағы Мәдениет үйі бар, онда қазір ғылыми-реставрациялық жұмыстар жүргізілуде.

2023 жылдың көктемінде сол кездегі Атырау қаласы әкімі Мейірім Қалауи «АЖ»-ға берген сұхбатында «паровозиктердің» орнына жаңа үйлер салғысы келетіндерге жерді аукцион арқылы сатуды жоспарлап отырғанын, әрі үйлер ретростильде салынуы тиіс екенін айтқан еді. Оңдасынов көшесінде сол жерде тұрған бір қабатты екі үй көп уақыттан бері авариялық деп танылып, тұрғындар көшірілген. Ал үйлер тозығы жеткен күйге келген еді. Сіздің тілшіңіз енді ол жерге не салынады деп сқрастырған еді.

Атырау әкімінің орынбасары Тілек Махуовтың қолы қойылған жауаптан белгілі болғандай, аталмыш жер учаскелері мемлекеттік меншік болып есептеледі және әлеуетті инвесторларды анықтау үшін аукцион өткізілмеген. Сүрілген «паровозиктердің» орнына құрылыс салу жоспарлары жоқ екен.

Әкімдік хатында сондай-ақ былай делінген:

«Қазіргі таңда қала бойынша көпқабатты апатты және тозығы жеткен 93 тұрғын үй бар. Сол тізімде Жилгородок ықшамауданында орналасқан 12 үй бар, атап айтқанда: Волгоградская көшесі №3, 5, 10; Әуезов көшесі №3, 5, 7, 9, 13, 17, 18; Оңдасынов көшесі №7, 11.

Қазіргі уақытта реновация бағдарламасын жүзеге асыру аясында қала әкімдігі апатты үйлердің тұрғындарын көшіру мәселесін шешу үшін жеке инвесторлармен келіссөздер жүргізуде. Барлық іс-шара жеке инвесторлар мен сүрілетін үйлердің иелері арасындағы екі жақты келісімдерге сәйкес жүргізіледі».

Лев ГУЗИКОВ

Автордың мұрағатынан алынған сурет

Бүгін, 13:06