Атырауда биыл 26 мыңға жуық жаңа жұмыс орны ашылды

Биыл Атырау облысында отыз мыңға жуық жаңа жұмыс орны ашылды деген баяндама жасалды. Сан әсерлі көрінеді, бірақ екшеп қарасақ, сұрақтар туындайды.

Өңірлік коммуникациялар қызметінің мәліметі бойынша,өңірлік жұмыспен қамту картасы аясында 25 781 жұмыс орны ашылды. Оның 15 мыңға жуығы — тұрақты, қалғаны — уақытша жұмыспен қамтылған. Ал іс жүзінде 18 мыңнан астам адам жұмысқа тұрған. Қалған 8 мыңдай жұмыс орнына қатысты ресми хабарламада ақпарат берілмеген.  

Жұмыспен қамтылғандардың бір бөлігі мемлекеттік бағдарламалар есебінен қамтамасыз етіледі. 4 мыңнан астам адам қоғамдық жұмыстарға қатысты, 1 900-ден астам жас маман «Жастар практикасы» бағдарламасынан өтті, «Күміс жас» жобасы арқылы шамамен 1 500 егде адам еңбекке тартылды. Әлеуметтік осал топтағы 291 адам өз ісін бастауға грант алды.

Сонымен қатар, 7 мыңнан астам жас тұрақты және уақытша жұмысқа орналастырылды делінген. Бұл ретте олар жоғарыда айтылған жұмысқа орналасқандардың қатарына енгізілген бе, әлде бөлек есептеле ме - ол туралы айтылмайды. 

Еңбек нарығында бәсекеге қабілеттілікті арттыру үшін 2 мыңнан астам адам «Skills Enbek» және «Бастау-Бизнес» бағдарламалары арқылы онлайн оқудан өтті. Қысқа мерзімді курстарға 168 адам қатысып, оның 91-і оқуды сәтті аяқтап, жұмысқа орналасты.

Осылайша, "26 мың жұмыс орны" келтірілген есептегі бұл сандардың артында статистика үшін үйреншікті көрініс жасырылған: жұмыспен қамтудың айтарлықтай бөлігі уақытша бағдарламалармен және қолдау шараларымен қамтамасыз етілген, ал тұрақты жұмыс орындарының нақты саны онша айқын емес.

Ақтолқын ФАЙЗУЛЛАЕВА

13 желтоқсан, 14:31