ЕҚДБ мен бірлескен бағдарлама аясында 10 мыңға жуық жұмыс орны құрылды

Астана қаласында Қазақстан Республикасы Ұлттық экономика министрлігі мен Еуропалық Қайта құру және даму банкі (ЕҚДБ) арасында шағын және орта бизнесті қолдау бағдарламаларын үйлестіру комитетінің XIII жыл сайынғы отырысы өтті.

Іс-шараға Ұлттық экономика вице-министрі Ерлан Сағынаев қатысты. Оның айтуынша, 2013 жылдан бері ынтымақтастық аясында 2,7 мыңнан астам консалтингтік жоба қаржыландырылып, 300-ден аса оқыту іс-шарасы ұйымдастырылған. Нәтижесінде 10 мыңға жуық жаңа жұмыс орны ашылып, компаниялардың 17%-ы ірі бизнес сегментіне өткен.

2025 жылғы 20 қаңтарда тараптар бағдарламаны 2030 жылға дейін ұзарту туралы қосымша келісімге қол қойды. Сонымен қатар өсу әлеуеті жоғары компанияларға арналған «Орта кәсіпкерлік кәсіпорындарының инвестициялық тартымдылығын арттыру» атты жаңа қолдау бағытын іске қосу туралы шешім қабылданды.

ЕҚДБ-ның Орталық Азия мен Моңғолиядағы консультациялық қызметтер бағдарламасының басшысы Симоне Зе Атанасовски инвестициялық әлеуеті бар орта кәсіпорындарды қолдауға ерекше мән берілетінін атап өтті.

Отырыс барысында кәсіпкерлермен ашық диалог өтіп, бизнес өкілдері экспортты дамыту, өнеркәсіпті қолдау және инновациялық жобаларды іске асырудағы мемлекеттік көмектің маңызын айтты.