Атырауда жаяу жүргіншілер көпіріндегі лифт істен шықты

Атырау тұрғындары «Академия» аялдамасының жанындағы жаяу жүргіншілер көпіріндегі істемей тұрған лифтке шағымдануда.

Олардың айтуынша, бұл құрылғы бірнеше айдан бері жұмыс істемей тұр. Соның салдарынан мүмкіндігі шектеулі жандарға, кішкентай балалары бар ата-аналарға және егде жастағы тұрғындарға үлкен қиындықтар туындап отыр.

- Сәтпаев көшесіндегі көпірде лифт көптен бері істемейді. Егер оны жөндеуге қаражат болмаса, неге бірден пандус орнатпады? Сол себепті көп адам жолды рұқсат етілмеген жерден кесіп өтеді, өйткені ең жақын қауіпсіз өткел тым алыста, — дейді атыраулық Әйгерім Жолдыбаева.

Құрылыс нормаларына сәйкес, Қазақстандағы барлық қоғамдық нысандар мүмкіндігі шектеулі азаматтар үшін қолжетімді болуы тиіс. Бұл талаптарға пандустар, тұтқалар және қозғалысты қауіпсіз ететін басқа да элементтерді орнату кіреді.

Заңгерлердің айтуынша, пандустың болмауы немесе лифттің істен шығуы заң талаптарына қайшы келеді, ал жауапты ұйымдар әкімшілік жауапкершілікке тартылуы мүмкін.

Тұрғындар қалалық қызметтерден мәселені назарға алып, лифтіні жөндеуді немесе көпірге пандус орнатуды сұрап отыр.

Айгүл МАНСУРОВА

Суреттер әлеуметтік желілерден алынған

Бүгін, 11:09