Ақтөбеде ақылды жаяу жүргіншілер өткелі пайда болды

Жүйе адам жолдың жүріс бөлігіне шықпай тұрып-ақ жарық сигналын беріп, жылдамдықты төмендету қажеттігін ескертеді.

Қаладағы Әбілқайыр хан мен Сағадат Нұрмағамбетов көшелерінің қиылысында отандық NAZAR автономды жаяу жүргіншілер өткелі тәжірибелік пайдалануға берілді.

Жүйе жаяу жүргінші анықталған сәтте автоматты түрде іске қосылып, қосымша жарықтандыруды және жол бетіне стоп-сызықтың жарық проекциясын шығарады.

Бұл қараңғы уақытта өткелдің көрінуін айтарлықтай арттырып, жолды кесіп өту қаупі туындайтын сәтте жүргізушілердің назарын күшейтеді.

Жобаны енгізуге ғылыми-техникалық сүйемелдеуді «Қазақстан жол ғылыми-зерттеу институты» (ҚазжолҒЗИ) жүзеге асыруда. Институт мамандары аталған учаскеде мониторинг жүргізіп, көлік құралдарының қозғалыс параметрлерін талдап, нысанның қолданыстағы нормативтік талаптарға сәйкестігін тексереді.

Салалық құрылымдардың деректеріне сәйкес, жол-көлік оқиғаларының ең кең таралған түрлерінің бірі — жаяу жүргіншіні қағып кету. Мұндай жағдайлардың негізгі себептері ретінде жарықтандырудың жеткіліксіздігі және реттелмейтін жаяу өткелдердің жеткілікті деңгейде көзге түспеуі аталады.

— Біз жүйе орнатылғаннан кейін жүргізушілердің өздерін қалай ұстайтындығын бағалаймыз. Көлік ағынының жылдамдығын, ықтимал қақтығыс жағдайларының санын және өткелді пайдалану қарқындылығын тіркейміз. Мониторинг қорытындысы бойынша бұл шешімнің тиімділігіне объективті баға беріледі, — деді ҚазжолҒЗИ бас маманы Закиржан Данияр.

Институт сарапшыларының ұқсас халықаралық тәжірибені талдауына негізделген бағалауға сәйкес, белсенді жарықтық индикацияны қолдану жаяу жүргіншіні қағып кету оқиғаларын орта есеппен 30–40 пайызға дейін азайтуы мүмкін.

Қазіргі уақытта жоба практикалық сынақ кезеңінен өтуде. Жиналған деректер талданғаннан кейін республикалық және жергілікті маңызы бар автомобиль жолдары желісінде осындай автономды өткелдерді кезең-кезеңімен енгізу мүмкіндігі қарастырылатын болады. 

Айта кетелік Алматыдағы «ақылды» бағдаршамдар туралы жазған едік.