Атыраудағы полиэтилен зауыты: бір жылдық нәтиже

Атырау облысында полиэтилен өндіру зауытының құрылысы басталғанына бір жыл өткен соң жобаның дайындық деңгейі 25%-ды құрады. 

Бұл туралы «ҚазМұнайГаз» ұлттық компаниясы хабарлады.

2025 жылдың 31 наурызында болашақ полиэтилен зауытының пиролиз қондырғысының іргетасына алғашқы қада қағылып, ауқымды құрылыс басталған еді. Барлық процесс бекітілген кестеге сәйкес жүргізілуде.

Этаннан этилен алуға арналған пиролиз қондырғысында қада қағу жұмыстары 95%-ға орындалды, іргетас құю 24%-дан асты. 

Құбыр эстакадаларына арналған темірбетон конструкцияларын монтаждау да жалғасуда. 2026 жылы ірі габаритті жабдықтардың алғашқы легін жеткізу және орнату жоспарланған. Оның ішінде «АтырауНефтеМаш» зауытында дайындалып жатқан салмағы 1,5 мың тоннаға дейінгі және 700 тонна болатын екі бағана бар. Жалпы салмағы 11 760 фрахт тоннасына тең жабдықтың алғашқы партиясы Қазақстанға жөнелтілді.

Полимерлеу алаңында және жалпызауыттық шаруашылық нысандарда 567 мың м³ жер жұмыстары (24%) орындалып, 5 720 қада (15%) қағылды.

Құрылысқа бүгінде 1 421 адам (оның 90%-дан астамы – Қазақстан азаматтары) және 330 техника жұмылдырылған. Зауытты пайдалануға беру және алғашқы өнімді шығару 2029 жылға жоспарланып отыр.

Бүгін, 13:59