“Атыраулық хакер“ сот алдына келді

Атырау облысында отбасының жоғалып кетуіне қатысты желіде өз нұсқасын таратқан "хакерге" қатысты қылмыстық іс сотқа жолданды. Бұл туралы ішкі істер министрінің орынбасары Санжар Әділов айтты, деп хабарлайды Tengrinews.kz тілшісі.

Вице-министрдің сөзінше, қылмыстық істі тергеу аяқталды.

"Бүгінде аталған қылмыстық іс бойынша айыпталушы сотқа тапсырылды. Тергеу аяқталды. Оның ешқандай деректерге, ол пайдалана алатын базаларға қолжетімділігі болған жоқ", - деді Әділов Құрылтайда өткен брифинг кезінде.

Министрдің орынбасары ер адам жариялаған ақпарат қызметтік материалдардан алынғанын атап өтті.

"Алынған және жарияланған мәліметтердің барлығы - біздің қолданыста болған қызметтік ақпарат. Ақпараттың тарап кетуіне қатысты кінәлі лауазымды тұлғалар қатаң жауапкершілікке тартылды", - деп жалғастырды Әділов.

Бұған дейін Атырау облыстық полиция департаменті отбасының жоғалып кетуіне қатысты өз нұсқасын желіде таратып, "өзін хакермін деп жариялаған" адам Қазақстанға депортацияланғанын хабарлаған болатын. Халықаралық іздеуде жүрген 32 жастағы ер адам Түркияда болған.

"Атыраулық хакерге" бірнеше рет алаяқтық жасады деген айып тағылып отыр. Бұл ретте полиция аталған айыптау отбасының қаза болуына қатысты іспен байланысы жоқ екенін нақтылады.

Бұл ер адам Атырау облысындағы бір отбасының жоғалып кетуіне қатысты резонансты оқиғадан кейін әлеуметтік желіде танымал болды. Жоғалып кеткендер туралы хабардан кейін желіде өзін "Атыраулық хакер" деп таныстырған адам пайда болып, жеке тергеу жүргізгенін мәлімдеді.

Ол жариялаған бейнежазбалар әлеуметтік желілерде тез тарап кетті. Атап айтқанда, "атыраулық хакер" ықтимал күдікті - қаза тапқандардың қызының күйеуі туралы хабарлаған. Ол келтірген мәлімет бойынша, қарашаның ортасынан бастап отағасының телефоны жүйелі түрде қосылуын қойған-мыс.

Сондай-ақ ер адам күдікті қарашада Түркияға шығып кеткенін, сол жақта отбасы мүшелері бірінің банк картасы қолданылғанын, кейін Қазақстан аумағында орын ауыстырғанын айтты. Оның сөзінше, желтоқсанда күдікті мен оның жұбайының SIM-карталары Шымкентте тіркеліп, одан кейін олар Өзбекстанға өтіп, кейін Оңтүстік-Шығыс Азия елдерінің біріне баруы мүмкін болған.

Айта кетейік, 2026 жылдың ақпанында күдікті әйелімен бірге расында Индонезияда ұсталды.

Бізді Google-дың негізгі дереккөздер тізіміне қосыңыз