Мен ешкімді өлтірген жоқпын : Атыраулық хакер тағы бір шұғыл мәлімдеме жасады (ФОТО)

Атырау облысында із-түзсіз жоғалған отбасыға қатысты деректерді жариялап жүрген, қоғамда "атыраулық хакер" атанып кеткен азамат өзіне тағылған айыптауларға байланысты мәлімдеме жасады, деп хабарлайды Arasha.kz.

Оның айтуынша, өзіне Интерпол арқылы халықаралық іздеу жарияланған. Алайда ол бұл шешімнің ауыр қылмыспен байланысы жоқ екенін алға тартып отыр.

"Қазір мені іздестіріп жатыр. Егер бір күні хабарсыз кетсем, бұл мені сол сәтте Қазақстанға экстрадициялап жіберді деген сөз. Ондай жағдай болса, осы парақшада алдын ала жазылып қойған видео жарияланады. Мен ешкімді өлтірген жоқпын, Интерпол арқылы іздейтіндей қылмыс жасаған жоқпын", – деп жазды ол.

Сондай-ақ хакер өзіне қатысты мәселе тек қаржылық дауға байланысты болуы мүмкін екенін меңзеді. Оның сөзінше, бұрын арызданушыларға прокуратура тарапынан "іс тоқтатылды" деген хабарлама келгенімен, қарыз мәселесі толық шешілмеген.

"Менің ойымша, себеп осы қарызға байланысты болуы мүмкін, бірақ бұған да күмәнім бар. Себебі бұған дейін ел ішінде жүргенімде де іздеуде болғанмын. Сол кезде қарыздарды жауып, маған сұрақ туындамас үшін қаржы жинау мақсатында қор ашпақ болдым. Бірақ қаражат жиналмады. Мүмкін, басқа есепшот көрсетілген соң адамдар сенбеген шығар. Бәрі Алланың қалауымен. Егер жазмыш болса, одан қашып құтыла алмайсың", – дейді ол.